Një ndër largimet e papritura të Partizanit është mesfushori Ardit Hila. Ai ndau rrugët me ekipin e kuq sot, ndërsa lëshoi dhe një mesazh lamtumire për tifozerinë e “Demave”.
Kryeqytetasit nuk rinovuan me titullarin që ndihmoi në titullin kampion dhe tashmë rrugët janë ndarë. Hila ka folur në lidhje me largimin dhe nuk bën aspak polemika.
Hila – “26 vite! 26 vite jetë, pas 26 vitesh kampion i Shqipërisë me F.K Partizani. Mund të kishin qenë dhe 27 si numri i fanellës që kam mbajtur mbi shpinë apo ndoshta edhe me shumë!
Të dashur tifozë, sot pas takimit që zhvillova me drejtorin sportiv z. Olsi Rama vendosa të largohem nga F.K Partizani.
Kam dhënë gjithçka nga vetja për të qenë kontribues sado i vogël në suksesin e këtij klubi. I vetëm nuk mund t’ia dalësh.
“Meritat shkojnë së pari për ju që më keni mbështetur edhe në momentet më të vështira për të më rikthyer më të fortë. Meritat shkojnë për trajnerin z. Skënder Gega, puna e të cilit na solli këtë trofe. Nuk mundem të mos përmend kolegët me të cilët kam ndarë javë pas jave çdo moment. Falenderoj z. Demi për këtë mundësi që më dha. Të gjithë mbase jemi kalimtarë, vetëm ju nuk jeni Ultras Guerrils. Ju uroj suksese në sezonet në vazhdim. Mirënjohje dhe falenderime”, – shkruan Hila.
