Drejtoria e Hetimit Tatimor, po intensifikon kontrollet në kuadër të planit operacional, që po zbatohet në qendrat e qyteteve kryesore dhe në pikat e tregtimit të karburanteve.
Referuar të dhënave të kësaj strukture, gjatë periudhës 1-11 tetor, janë kontrolluar 1 819 subjekte, nga të cilët 602 janë konstatuar me shkelje të legjislacionit tatimor. Vlera e penaliteteve të vendosura është rreth 19.8 milionë lekë.
Drejtoria e Përgjithshme e Tatimeve bën të ditur se 8 tatimpaguesve u janë bllokuar ambientet për 30 ditë kalendarike për mos lëshim kuponi tatimor (hera e dytë), përkatësisht; 50 subjekte janë konstatuar të paregjistruar në organet tatimore dhe është marrë masat e bllokimit deri në momentin e regjistrimit të tyre si subjekt i TVSH-së; 149 tatimpagues janë konstatuar me shkelje për mos lëshimit të kuponit tatimor (hera e parë); 44 tatimpagues nuk kanë pasur të instaluar pajisjet fiskale, ndërsa 28 të tjerë nuk i mbanin në gjendje pune dhe 118 subjekte janë konstatuar se dispononin mallra pa dokumentacion tatimor.
Administrata Tatimore, në asnjë rast nuk ka si qëllim kryesor ndëshkimin e tatimpaguesve, por ndërgjegjësimin e tyre për vetëdeklarimet dhe përmbushjen me korrektësi të detyrimeve tatimore.
/b.d
