Pilotët e avionit që u rrëzua në Etiopi muajin e shkuar ndoqën të gjitha procedurat e rekomanduara por fatkeqësisht nuk arritën të rimarrin kontrollin e mjetit fluturues.
Ministrja etiopiane e Transportit, Dagmauit Moges, gjatë paraqitjes së raportit paraprak të hetimit të aksidentit, nuk hodhi përgjegjësinë mbi asnjërën palë, por bëri të qartë se në 6 deri 12 muajt e ardhshëm do të zbulohet nëse avioni kishte apo jo një defekt strukturor.
Moges i sugjeroi kompanisë amerikane të avionëve “Boeing” që të ekzaminojë programin e vet kompjuterik për të shmangur përsëritjen e këtyre fatkeqësive.
Moges:”Bazuar në informacionet e para, rekomandojmë që prodhuesi i avionit të kontrollojë me kujdes sistemin e komandimit automatik të mjetit fluturues pasi edhe më parë është vërejtur se mjeti ka shfaqur prirjen për t’u drejtuar poshtë pavarësisht manovrave të pilotëve. Gjithashtu rekomandojmë që autoritetet botërore të aviacionit të sigurohen që kjo problematikë është adresuar përpara se flota e këtyre avionëve të jetë e gatshme për udhëtim.”
Aksidenti i 10 marsit me avionin tip “Boeing 737 Max 8” ndodhi pak minuta pas ngritjes nga pista e aeroportit të Etiopisë, duke vrarë 157 pjesëtarët e ekuipazhit dhe pasagjerët.
Pesë muaj më parë një tjetër avion me 189 veta në bord po ashtu humbi kontrollin në brigjet e Indonezisë, në rrethana shumë të ngjashme me aksidentin e para katër javëve.
Të mërkurën, kompania e prodhimit të avionëve “Boeing” tha se po teston disa ndryshime në mjetet e saj fluturuese që kanë të bëjnë me sistemin e manovrimit dhe stabilitetit të avionit, i cili aktivizohet në rast se një nga motorët bllokohet ose humbet shpejtësinë.
Përditësimet do u kalohen së shpejti autoriteteve të aviacionit të disa shteteve që aktualisht kanë pezulluar fluturimet me avionët “Boeing 737 Max”, mes tyre edhe Shqipëria.
g.kosovari
