Presidenti turk kundërsulmon pas hetimit të hapur për përshëndetjet ushtarake të bëra nga lojtarët e kombëtares turke të futbollit, duke thënë se “është një e drejtë e natyrshme e sportistëve tanë të përshëndesin ushtarët”.
Presidenti i Turqisë, Rexhep Tajip Erdogan, akuzon UEFA-n se ka adoptuar një “qëndrim diskriminues” ndaj vendit të tij për fillimin e një hetimi disiplinor pas përshëndetjeve ushtarake të bëra nga lojtarët e tij (me rastin e festimit të golave nga lojtarët turq në ndeshjet kundër Shqipërisë dhe Francës) në mes të ofensivës turke në veri të Sirisë. Sipas Erdogan “është një e drejtë e natyrshme e sportistëve tanë për të përshëndetur ushtarët pas një fitoreje”.
UEFA njoftoi më 15 tetor hapjen e një hetimi kundër ekipit kombëtar turk të futbollit, i akuzuar për “provokim politik” të mundshëm pas përshëndetjes ushtarake të bërë nga lojtarët në ndeshjet kundër Shqipërisë dhe Francës, të vlefshme për kualifikueset në Euro 2020.
Përgjigja e Erdogan erdhi gjatë një konference për shtyp në Ankara, ku ai tha se “atletët që përfaqësojnë vendin tonë jashtë vendit janë viktima të një fushate linçimi që nga fillimi i operacionit. Ne hedhim poshtë qëndrimin diskriminues, të padrejtë dhe politik ndaj kombëtares sonë dhe klubeve tona”.
/a.r
