Prokuroria e Tiranës prej më shumë se një muaj ka shpallur në kërkim shtetasin Italian, Antonio Abrusci, administrator i kompanisë “Ecologica sh.p.k.”. Mbi të rëndon akuza e mashtrimit dhe falsifikimit të dokumenteve gjatë pjesëmarrjes në tenderin për pastrimin e zonës lindore të qytetit të Tiranës.
Agjencia e Prokurimit Publik pezulloi procedurën e tenderimit dhe kërkoi nga Ministria e Transporteve verifikimin e dokumentacionit të paraqitur nga “Ecologica sh.p.k.”. Pas këtij verifikimi nga Drejtoria e Shërbimit të Transportit Rrugor në Tiranë rezultoi se pretendimet e ngritura ishin të sakta dhe se dokumentet për 12 automjetet që kjo kompani deklaronte se kishte në pronësi ishin të falsifikuara.
Për arsye se falsifikimi përbën vepër penale, kjo Ministri depozitoi kallëzim ndaj administratorit të kësaj kompanie për hetime më të thella. Organi i akuzës nisi menjëherë hetimet përkatëse dhe pasi bëri ekspertizën e nevojshme mbi dokumentet e paraqitura nga kompania “Ecologica sh.p.k.”, arriti në përfundimin se ato ishin falsifikuar. Verifikimi rast pas rasti për këto 12 automjete, nxori në pah disa fakte që rëndojnë edhe më shumë situatën e kësaj kompanie.
Prokuroria arriti të zbulojë se nga viti 2011, një pjesë e këtyre makinerive nuk qarkullonin, të tjerat nuk kishin paguar taksat dhe siguracionin e detyrueshëm dhe në disa raste nuk kishin kaluar as testin e kontrollit teknik.
Por këto rezultate të hetimit kompromentojnë rende ish kryetarin e Bashkisë se Tiranës, Lulzim Basha, në vitet 2011-2015 për faktin se kompania “Ecologica sh.p.k.” me këtë flotë fantazmë mjetesh pastrimi ka mundur të fitojë në mënyrë sistematike 7 tendera pastrimi në vitet 2013-2015, kohë kur kryebashkiak ishte Lulëzim Basha.
Më konkretisht, nga libri i shpalljeve të prokurimeve publike rezulton se “Ecologica sh.p.k.” ka fituar tender pastrimi ne datat:
– 09.09.2013
– 18.09.2014
– 27.11.2014
– 29.12.2014
– 30.01.2015
– 27.02.2015
– 08.04.2015
Siç shihet “Ecologica sh.p.k.” dhe administratori i saj Antonio Abrusci kanë qenë klientë të përhershëm të ish-kryebashkiakut Basha. Kjo do të thotë që kjo kompani për vite të tëra ka fituar tenderë dhe nuk ka bërë asnjë punë në terren me pastrimin ose ka kryer shërbimin e kërkuar me mjete ose që nuk paguanin as taksa dhe as kalonin ndonjëherë në kontroll teknik. Dhe në të dyja rastet kjo nuk mund të bëhej pa pëlqimin e drejtuesve të atëhershëm të Bashkisë. /r.a
