Për të hetuar grupet kriminale dhe parandaluar krimet, Ministria e Brendshme u ka bërë apel qytetarëve dhe ekspertëve që të bashkëpunojnë.
Në një dokument që Report Tv ka siguruar, Ministria e Brendshme u bën thirrje qytetarëve për të aplikuar si ekspertë të jashtëm në fusha të ndryshme. Kjo thirrje vjen vetëm pak ditë para se në Shqipëri të vijnë ekspertët e FBI-së. Përveç ekspertizës së huaj, Ministria e Brendshme kërkon edhe bashkëpunimin e qytetarëve.
“Ministria synon të identifikojë kandidatë të përshtatshëm dhe të ngrejë Grupe Ekspertësh, të cilët do të asistojnë Ministrinë dhe institucionet në varësi në përmbushjen me eficensë, cilësisë të misionit dhe detyrave të tyre.
Kjo thirrje ka për qëllim identifikimin dhe hartimin e një liste me ekspertë të posaçëm dhe jo plotësimin e ndonjë posti apo vendi vakant”, – thotë Ministria e Brendshme.
Ekspertët që kërkohen të punësohen janë të fusha të ndryshme, duke filluar nga siguria e jetës, rendi publik, parandalimi dhe hetimi krimeve dhe deri te Pastrimi i Parave, ekstremizmi, krimi ekonomik dhe hetimi i grupeve kriminale.
Përveç informatorëve që ka sot Ministria e Brendshme dhe Policia e Shtetit, për të hetuar pasuritë e grupeve kriminale po u bëhet thirrje edhe qytetarëve.
Burime nga Ministria e Brendshme sqaruan se presin që të marrin informacione të vyera nga qytetarët për disa krime. Për tu punësuar si ekspertë të jashtëm në Ministrinë e Brendshme duhet të keni mbaruar arsimin e lartë, ndërkohë që do paguheni për kohën që do punoni. Thirrja vjen edhe në kuadër të nismës “Policimi në Komunitet”, ku qytetarët janë ftuar të bashkëpunojnë me uniformat blu
