Në Turqi po zhvillohen hetimet për të çuar para drejtësisë personat përgjegjës për shembjen e banesave nga tërmeti shkatërrues që goditi vendin natën e 6 shkurtit.
Më shumë se 160,000 ndërtesa që përmbanin 520,000 apartamente u shembën ose u dëmtuan rëndë nga fatkeqësia, më e rënda në historinë moderne të vendit.
Gjatë një konference për shtyp ministri i Drejtësisë, Bekir Bozdag, tha se më shumë se 600 njerëz janë nën hetim në lidhje me ndërtesat e shembura.
Autoritet turke kanë arrestuar 184 persona të cilët akuzohen si përgjegjës humbjen e jetëve nga ndërtesat e shembura. Të arrestuarit përfshijnë 79 kontraktorë ndërtimi, 74 persona që mbajnë përgjegjësi ligjore për ndërtesat, 13 pronarë pronash dhe 18 persona që kishin bërë ndryshime në ndërtesa.
Gati tre javë që nga katastrofa, nuk ka një numër përfundimtar të viktimave në Turqi dhe zyrtarët nuk kanë bërë të ditur se sa trupa mund të jenë ende të bllokuar nën rrënoja.
Gati dy milionë njerëz të mbetur të pastrehë nga fatkeqësia po strehohen në tenda, dhe objekte të tjera por presidenti Rexhep Taip Erdogan ka premtuar se do të fillojë procesi i rindërtimit të shtëpive gjatë muajit të ardhshëm.
Prej vitesh ekspertët kishin paralajmëruar se për shkak të korrupsionit qindra ndërtime të reja ishin të pasigurta.
/a.r
