Agjentët federalë kontrollojnë banesën kongresmenes demokrate në Uashington, hetim për dokumentet e emigracionit
Agjentë federalë amerikanë kanë kontrolluar të hënën banesën e kongresmenes demokrate Ilhan Omar në Uashington, në kuadër të një hetimi penal që po zhvillohet nga autoritetet amerikane.
Sipas Departamentit të Drejtësisë (DOJ), agjentët e Njësisë së Hetimeve të Sigurisë Kombëtare (HSI), pjesë e strukturave të Departamentit të Sigurisë Kombëtare (DHS), kanë ekzekutuar një urdhër kontrolli të autorizuar nga gjykata.
“Ky veprim është pjesë e një hetimi federal në vazhdim”, deklaroi një zëdhënës i Departamentit të Drejtësisë, pa dhënë detaje të tjera mbi çështjen.
Sipas raportimit të New York Post, hetimi lidhet me dyshime për mashtrim të mundshëm në dokumentacionin e emigracionit të kongresmenes, përfshirë dokumentet që, sipas raportimeve, ishin plotësuar nga babai i saj tashmë i ndjerë kur ajo ishte fëmijë. Megjithatë, autoritetet nuk kanë bërë publike hollësi të plota që të konfirmojnë objektin e saktë të hetimit.
Çështja ishte bërë publike edhe më herët. Në shtator, Tom Homan, përgjegjësi i administratës Trump për politikat kufitare, kishte konfirmuar se ndaj Omar po zhvillohej një hetim penal, pa zbuluar hollësi mbi dyshimet konkrete. Në atë kohë, kongresmenja deklaroi se autoritetet federale nuk e kishin kontaktuar për këtë çështje.
Ilhan Omar, e lindur në Somali, përfaqëson distriktin e pestë të Minesotës në Dhomën e Përfaqësuesve të SHBA-së dhe është një nga zërat e njohur të krahut progresist të Partisë Demokrate.
Deri në publikimin e raportimeve, nuk ishin bërë të ditura akuza penale zyrtare ndaj saj në lidhje me këtë hetim. Autoritetet nuk kanë publikuar prova që të vërtetojnë shkeljet e dyshuara dhe çështja mbetet në zhvillim.
