Në Misionin tonë diplomatik në Gjenevë pritet të nisë një audit për mënyrën se si janë përdorur financat. Diplomatët e këtij misioni kanë dorëzuar në Ministrinë e Jashtme një material me shkeljet financiare të ambasadores Filloreta Kodra.
Një nga shkeljet e ambasadores Kodra është punësimi i bashkëshortit të saj, Astrit Kodra, pensionist, si financier pranë Misionit të Republikës së Shqipërisë në Gjenevë, në shkelje të plotë të ligjit dhe në konflikt të hapur interesi.
Blerina Zoto, këshilltarja jonë në Misionin diplomatik pranë OKB-së në Gjenevë, tashmë e shkarkuar nga ministri Klosi, e ka denoncuar publikisht në gazetën “Panorama” mënyrën se si dy bashkëshortët kanë drejtuar financat e Misionit tonë në Gjenevë.
“Bashkëshortët Kodra menaxhonin financat e Misionit, duke bashkëfirmosur bordero, fatura, mandate dhe gjithçka tjetër lypnin procedurat financiare.
Dhe deri para 8 muajsh, Financieri bashkëshort dhe Shefja e Misionit të gjitha pagesat i kryenin me lekë (franga) në dorë dhe asnjë veprim nuk kryhej nëpërmjet bankës. Financieri bashkëshort la detyrën, pasi një audit i MPJ evidentoi si shkelje prezencën e tij si financier, si dhe kryerjen e pagesave jo nëpërmjet bankës, por me lekë (franga) në dorë”, thuhet në denoncimin që diplomatet kanë dorëzuar në Ministrinë e Jashtme.
Në vijim të këtij denoncimi, rezulton se parregullsi në shkelje të ligjit janë bërë edhe për blerjen e pajisjeve të zyrës për Zoton me çmime disa herë më të shtrenjta.
“Shkeljet konsistojnë në ndjekjen e procedurës për blerjen e kësaj mobilieje, procedurë për të cilën Misioni duhej të kishte miratimin e MMSR, duke e klasifikuar te fondi i investimeve, nga totali i fondit që MMSR kishte akorduar për Diplomaten Zoto. Kjo blerje është një shkelje e procedurave financiare, ku Misioni eviton dhe nuk pyet Ministrinë, për një fond që buronte prej saj dhe që përdorimi i tij duhej dhe mund të bëhej vetëm me miratimin e MMSR / Drejtorisë përkatëse”, vijon denoncimi i diplomatëve të shërbimit tonë në Gjenevë.
Sipas tyre, shkelje të procedurave konstatohen që në procedurën e mbledhjes së ofertave dhe deri në blerjen e mobilies. “Teksa u interesuam dhe morëm disa oferta online nga biznese në Gjenevë, na rezulton se një mobilie e tillë në tregun zviceran varion nga 530 CHF deri 750 CHF.
Kurse Misioni i Shqipërisë në Gjenevë, megjithëse kreu, sipas tij, procedurën e mbledhjes së ofertave, në kërkim të një oferte të mirë, oferta më e mirë i rezultoi kjo, me vlerë 5266 CHF”, thuhet në material, ku evidentohet edhe një parregullsi e pazakontë.
“Në kuadër të së njëjtës blerje nga ana e Misionit, investigimi na çon para një dokumenti absurd, ku vula e shtetit shqiptar, e Misionit të Shqipërisë në Gjenevë dhe nënshkrimi i ambasadores Kodra vendosen mbi një ofertë biznesi privat në Gjenevë, arsyet dhe logjikën e këtij ‘certifikimi’, duke vulosur këtë dokument me vulën e shtetit shqiptar, mund të na i shpjegojë vetëm titullarja e Misionit,”, denoncojnë diplomatët.
Panorama/d.i.
