Politika shqiptare duket se ka kyçur gojën për rritjen stratosferike që ka pësuar karburanti ditët e fundit dhe veçanërisht nafta e cila ka kapur shifra rekord.
Edhe pse ka pasur një indinjim të madh nga qytetarë apo figura publike, deri më tani nuk ka qëndrime nga ligjvënësit tanë sa i përket kësaj loje shifrash që po ndikon në xhepat e qytetarëve të zakonshëm.
Ekspertët argumentojnë se qeveria duhet të ndërhyjë për të ulur ngarkesën fiskale, si e vetmja mënyrë për të amortizuar deri diku rritjen e çmimit.
Nga ana tjetër, shtrenjtimi i karburanteve pritet të ndikojë në rritjen e çmimeve të mallrave dhe produkteve të tjerë, duke dhënë impakt të drejtpërdrejtë në shumë sektorë, ku më të prekurit do të jenë transporti dhe prodhimi.
Në një reaksion zinxhir efektesh, kjo do të çojë në shtrenjtimin e kostos së jetesës për qytetarët.
Ndërkohë, deri më tani, ligjvënësit nuk kanë bërë asnjë oponencë në mbrojtje të interesit publik. (TemA)
