Këshilli i Ministrave vendosi heqjen e masave të përkohshme për ndërprerjen e aksesit në platformën on-line “TikTok” në territorin e Shqipërisë.
Në vendim thuhet se heqja e këtyre masave vjen pas adresimit të problematikave në fushën e sigurisë publike dhe sociale në mjedisin digjital, të cilat kishin çuar më herët në kufizimin e aksesit në këtë platformë.
Autoriteti Kombëtar për Sigurinë Kibernetike (AKSK), në bashkëpunim me entet rregullatore përkatëse, është ngarkuar të ndërmarrë veprimet e nevojshme për realizimin e heqjes së masave për ndërprerjen e aksesit në TikTok.
Heqja e masave të përkohshme për ndërprerjen e aksesit në platformën online TikTok është rezultat i një rivlerësimi institucional dhe i adresimit konkret të shqetësimeve që lidhen me sigurinë publike, sociale dhe digjitale, veçanërisht për fëmijët dhe të rinjtë.
Ky vendim shënon kalimin nga masa kufizuese në një fazë monitorimi aktiv, bashkëpunimi ndërinstitucional dhe përgjegjësie të përbashkët me platformat digjitale.
Paralelisht, po punohet për hartimin e një plani të mirëfilltë komunikimi dhe ndërgjegjësimi, të fokusuar te fëmijët, të rinjtë, prindërit dhe mësuesit, për përdorimin e sigurt dhe të përgjegjshëm të platformave online. Qëllimi është i qartë dhe i orientuar drejt edukimit digjital, mbrojtjes reale dhe ndërtimi i një kulture sigurie në hapësirën online.
Kujtojmë se më 6 mars 2025, qeveria shqiptare kishte miratuar mbylljen e përkohshme të platformës TikTok për një periudhë 12-mujore në të gjithë territorin e vendit.
Në atë kohë, ministrja e Arsimit, Ogerta Manastirliu, deklaroi se masa ishte e përkohshme dhe synonte mbrojtjen e fëmijëve dhe të rinjve.
“Është mbyllje e përkohshme e qasjes në TikTok. I kemi dhënë vetes deri në 12 muaj kohë që, në bashkërendim me përfaqësuesit e kësaj platforme, të marrim të gjitha masat e nevojshme për të vendosur kushte dhe kritere që qasja në TikTok të mos dëmtojë fëmijët dhe të rinjtë”, tha Manastirliu.
Vendimi për mbylljen e përkohshme erdhi si pasojë e një numri të lartë videosh dhe materialesh të publikuara në platformë, të cilat nxisnin dhunë, bullizëm dhe sjellje problematike mes të rinjve, ku u vra edhe 14-vjeçari Martin Cani nga bashkëmoshatari i tij.
