Ministri, Ilir Beqaj, bëri të ditur sot se shërbimi i hemodializës shumë shpejt do të shtrihet në të gjithë vendin. Sipas tij, për herë të parë qendra e re e Hemodializës do të ngrihet edhe në Spitalin Rajonal të Korçës, si dhe në Elbasan.
“Rrjeti i shërbimit të hemodializës po shtrihet hap pas hapi në të gjithë vendin. Po punojmë intensivisht për përmirësimin, modernizimin dhe zgjerimin e infrastrukturës së këtij shërbimi jetik për pacientët që e kanë të nevojshëm atë në Elbasan, si dhe ofrimin për herë të parë edhe në Qendrën e re të Hemodializës që po ngremë në Spitalin Rajonal të Korçës. Deri më sot, për të kryer hemodializën, pacientët e Qarqeve të Elbasanit dhe të Korçës, të shoqëruar nga familjarë, duhet të udhëtonin tre herë në javë drejt Tiranës apo edhe jashtë vendit, për të kryer seancat që zgjasin deri në 4 orë dhe me tre turne. Në pranverë të këtij viti, rreth 150 të sëmurë me insuficiencë renale nga Qarku i Elbasanit dhe rreth 100 nga Qarku i Korçës do t’i japin fund kalvarit të vuajtjeve fizike dhe shpirtërore, por edhe shpenzimeve marramendëse, duke e marrë #FALAS këtë shërbim në kushte optimale dhe standarde bashkëkohorë pranë Qendrave të reja të Hemodializës që po ngrihen pranë spitaleve rajonale të Elbasanit dhe Korçës”, thekson Beqaj.
Ministri i shëndetësis bën të ditur se dy qendrat e reja të hemodializës që po ndërtohen në Elbasan dhe Korçë, pas atyre të Vlorës, Shkodrës dhe Lezhës, janë investime të mundësuara nga partneriteti publik-privat. Ndërkohë që kostoja e këtij shërbimi që përfitohet #FALAS nga pacientët është më e ulët se ajo që kryhej deri dje.
ma.me
