Krimi Ekonomik pranë Policisë së Tiranës ka zbarkuar pranë Autoritetit të Kontrollit Ushqimor, ku ka sekuestruar të gjithë dokumentacionin që disponon ky institucion sa i takon kontrolleve që janë ushtruar për subjektin privat Sori-Al.
Kompania e Alma Tafanit, bashkëshorte e Nikolin Jakës, dyshohet se përmes shërbimeve katering ka helmuar dy herë radhazi studentët e Akademisë së Sigurisë, rasti i parë në maj dhe ky i fundit para pak ditësh.
Sektori kundër Krimit Ekonomik ka sekuestruar të gjithë dokumentacionin e AKU-së që nga janari deri tani, për të parë nëse Sori-Al është kontrolluar brenda ligjeve sa i takon dy skandaleve brenda një muaji të ndodhura brenda ambienteve të Akademisë së Sigurisë, ku përgatiten oficerët e ardhshëm të Policisë së Shtetit.
Ndërkohë, burime bëjnë me dije se Prokuroria e Tiranës është në pritje të analizave zyrtare për të përcaktuar shkakun e vërtetë të helmimit të 60 studentëve, të cilët u dërguan në spitalin e QSUT-së me shenja të dukshme helmimi si dhimbje barku, të vjella, temperaturë etj.
Dosja e helmimit të dytë pritet të bashkohet në një të vetme me rastin e parë, ngjarje e ndodhur në fillim të muajit maj të këtij viti.
Ditë më parë, Komisariati nr. 1 në Tiranë ka marrë në pyetje administratoren e Sori-Al, Alma Tafani, e cila ka deklaruar se ka bërë çdo ditë furnizimin me ushqim për studentët e Akademisë së Sigurisë, ku sipas saj çdo vakt ushqimor është gatuar dhe më pas shpërndarë sipas procedurave normale, duke respektuar kushtet e higjienës.
Në pyetje gjithashtu janë marrë edhe punonjësit e kësaj kompanie, të cilët kanë për detyrë përgatitjen e ushqimeve për studentët. Deri në këtë fazë të hetimit, asnjë person nuk është marrë në hetim sa i takon skandalit të dytë, pasi pritet grumbullimi i provave dhe më pas do të jetë Prokuroria e Tiranës ajo që do të urdhërojë për veprime policinë.
Duket se veprimet hetimore janë paralizuar deri në përfundim të analizave të 14 mostrave të marra në total, 7 nga vakti i drekës dhe 7 nga vakti i darkës.
Edhe pse në muajin maj Sori-Al helmoi 58 studentë, duke i infektuar me Escherichia coli dhe Stafilokok të tipit B, AKU ia riktheu aktivitetin kompanisë së Alma Tafanit dhe u mjaftua me një gjobë prej 1.5 milionë lekësh.
Vetë kompania Sori-Al ka reaguar disa herë në lidhje me këto skandale, ku ka akuzuar studentët e dyshuar të helmuar duke thënë se nuk i kanë larë duart përpara se të konsumojnë ushqimin, ose mund të jenë prekur nga virozat.
