Hekurudha me shpejtësi të lartë Xhakartë-Bandung (HSR), që ka kremtuar njëvjetorin të enjten, ka transportuar 5.79 milionë udhëtarë, sipas “PT Kereta Cepat Indonesia-China” (KCIC), një ndërmarrje e përbashkët indoneziano-kineze që ka ndërtuar dhe vë në funksionim hekurudhën.
Që nga përurimi në tetor 2023, në këtë hekurudhë kanë qarkulluar mbi 15 826 trena, të cilët kanë përshkuar gjithsej mbi 2.57 milionë kilometra. Numri i shërbimeve ditore të trenit është shtuar nga 14 në fillim të vënies në funksionim në 52, dhe ndenjëset e udhëtarëve janë rritur nga 8 400 në mbi 31 000. Kulmi ditor i udhëtimeve ka arritur në 24 132, sipas statistikave të KCIC-it.
Hekurudha me shpejtësi të lartë Xhakartë-Bandung është plotësisht elektrike, duke ulur ndjeshëm konsumin e karburantit dhe lëshimet. KCIC-i theksoi se kjo nismë e energjisë së gjelbër i kursen Indonezisë rreth 3.2 trilionë rupia (208 milionë dollarë amerikanë) në vit në kosto karburanti.
Përveç kësaj, të dhënat e qeverisë indoneziane tregojnë që periudhën e viteve 2019 – 2023, ky projekt kontribuoi me 86.5 trilionë rupia (afro 5.62 miliardë dollarë) në PBB-në e Xhakartës dhe Javës Perëndimore.
Me një shpejtësi të projektuar 350 km në orë, kjo hekurudhë me shpejtësi të lartë 142.3 km e gjatë e ka shkurtuar kohën e udhëtimit ndërmjet Xhakartës e Bandungut nga mbi tre orë në vetëm 46 minuta.
