EKSUKLUZIVE/ Konstitucionalisti, Sokol Hazizaj e komenton për Javanews, deklaratën më të fundit të ambasadorit amerikan në Tiranë, Donald Lu, se SHBA ka refuzuar tu japë viza për në Amerikë disa gjyqtarëve të korruptuar, si shprehjen më të drejtëpërdrejtë të vendosmërisë amerikane për të pastruar sistemin e drejtësis në Shqipëri.
Sipas tij, duke qenë i qartë për misionin dhe rëndësin që i jep shteti amerikan betejës ndaj korrupsionit në Shqipëri, nuk mund dhe nuk ka se si të jesh kundër çdo lloj nisme që ndërmerr ambasada amerikane dhe vet Ambasadori, si përfaqësuesi më i lartë i saj. “Në këtë kuptim edhe ky deklarim i ambasadorit Lu, tregon nga njëra anë se sa e ulët është konsiderata e SHBA-së për institucionet shqiptare dhe përfaqësuesit e saj. Nga ana tjetër, vendosja e kufirit të së drejtës për lirinë e shtetasve shqiptarë të korruptuar, është treguesi më i mirë ose paralajmërimi më i mirë për të gjithë shoqërinë që për shkak të korrupsionit mund të shkojmë në vetizolim të gjithë, pa përjashtuar vet shoqerinë”, shprehet Hazizaj për Javanews.
Lidhur me lakimin e emrit të anëtarit të Këshillit të Lartë të Drejtësis, gjyqtarin Gjin Gjoni, si një person që i është refuzuar viza amerikane, Hazizaj shprehet se duke abstraguar për emra të veçantë, siç edhe vetë Ambasada abstragon, është shpreja më e qartë kritike që SHBA lëshon në adresë të atyre institucioneve të cilat nuk e venë “ujin në zjarr” për këtë situatë të rëndë në të cilën përballet sistemi i drejtësis. “Lakimi i çdo emri të veçantë, qoftë dhe i një anëtari të KLD-së, kur fenomeni deklarohet në mënyrë të vazhdueshme dhe nuk konstatohet ndonjë hap i rëndësishëm në luftën ligjore ndaj tij, ngjan me fjalën tradicionale shqiptare se përsëritja është mëmë e dijes, por edhe babai i mërzisë. Diçka e tillë më duket se po ndodh. Si e tillë po e bën Shqipërinë dhe shqiptarët të humbasin besimin mbi këdo dhe për këdo”, komenton Hazizaj për Javanews.
Sipas tij, me deklaratat e ambasadorit Lu, sot drejtësisë shqiptare i ka ardhur mesazhi, të paktën moralisht, se ndryshimet janë të domosdoshme, dhe nga ana tjetër rezistenca ndaj këtyre ndryshimeve dhe mungesa e ndëshkueshmërisë së menjëhershme ndaj krimit në të gjitha format e tij, nuk bën gjë tjeter veçse zgjat agoninë e rënies së pushtetit të drejtësisë. “Ka nevojë për drejtësi brenda drejtësisë. Sirenat e alarmit kanë filluar të bien tashmë”, dekaron Hazizaj për Javanews.
