Mesfushori i Chelse-at, Eden Hazard, ka deklaruar se kurrë nuk do të synojë rekordet e vendosura nga Cristiano Ronaldo dhe Lionel Messi. Hazardi pati sezon të shkëlqyer vitin e kaluar në Premier Ligë, por thotë se ai kurrë nuk do të bëhet “golashënues i vërtetë”.
“Shpesh e pyes veten çfarë mund të bëj që të bëhem si Messi ose Ronaldo dhe të shënoj 50 ose 60 gola në sezon. Mundohem, sigurisht, por e kuptoj se kurrë nuk do të bëhem golashënues i vërtetë. Nuk është për mua. Ajo është çështje mentale – kur është rezultati 2 me 0, ata nuk mendojnë se është mjaft, për shembull. Nganjëherë unë akoma mendoj, pas vetëm një goli ‘kjo është mjaft’”, ka deklaruar Hazard për “Sport/Foot Magazine”.
“Nuk jam në kërkim të rekordeve si disa lojtarë tjerë… Nëse realizoj mes 15 dhe 20 golave në sezon do të jem shumë i lumtur”, shtoi belgu, që sezonin e kaluar shënoi 19 gola në 52 ndeshje.
