Ministri i Transporteve Edmond Haxhinasto dhe kryetari i Bashkisë së Tiranës Erjon Veliaj inspektuan punimet për projektin e Unazës së Madhe. Njëzëri ata theksuan se problemi kryesor që ka krijuar ngërç dhe vonesa për përfundimin e projektit janë shpronësimet. “Jemi në një lod të rëndësishëm të unazës, është lodi i parë. Punimet janë duke ecur por duhet të ecnin më shpejt. Çështja e shpronësimeve mbetet një problem që kërkon ndërhyrje ligjore dhe do ta realizojmë së shpejti besoj, pasi heqja e këtij ngërçi do na çlirojë nga shumë probleme. Imagjinoni kur ka filluar ky projekt dhe ende ka pengesa ligjore”, tha Haxhinasto.
Për kryebashkiakun Veliaj, problemi i shpronësimeve është i mbartur nga e shkuara, pasi sipas tij janë legalizuar ndërtime të paligjshme mbi kolektor. Ai kërkoi nga qeveria më shumë financime, duke shtuar se Tirana i jep më shumë buxhetit të shtetit nga taksat, por merr më pak.
“Ju e dini fare mirë në Shqipëri tre pllaka të shtrosh duhet t’i rrish te koka. Ndaj po i rrim te koka këtij projekti. Ashtu si minsitri ndihem i brengodur për faktin që shqiptarët që paguajnë taksat, i duhet sërish të paguajnë për të bërë shpronësimet, shpronësime që janë legalizuar dhe hipoitekuar deri në vitin 2013, mbi kolektorë, dhe na duhet të shpronësojmë prona që janë bërë legale totalisht në mënyrë të jashtëligjshme. Më vjen mirë që pas dy vitesh, i jemi rikthyer bashkëpunimit serioz. Do t’i bashkohem ministrit për të lobuar pranë qeverisë për të shtuar financimet për tre lodet e rrugës. Janë 100 mijë banorë që do të përfitonin nga përmbushja në kohë e projektit. Është një grup shtëpish mbi kolektor që kanë marë status legalizimi dhe hipotekimi, gjë që është absurde, megjithatë këto janë ligjet ne do bëjmë shpronësimet. Është shumë e rëndësishme që abuzimet me ndërtimet në kolektor”, tha Veliaj.
