Ministri i Transportit dhe Infrastrukturës Edmond Haxhinasto, mori pjesë në prezantimin final të Strategjisë Kombëtare të Transportit. E pranishme në këtë aktivitet ishte edhe Ambasadorja e Delegacionit të Bashkimit Europian, Romana Vlahutin.

Haxhinasto e ka vlerësuar strategjinë si një moment shumë të rëndësishëm në politik-bërjen në fushën e transportit, e cila, sipas tij, do të pajisë këtë Ministri me një dokument reference në politikat për zhvillimin e infrastrukturës dhe për dhënien e shërbimeve cilësore të transportit. Sipas tij qëllimi final është që edhe ky sektor i rëndësishëm për ekonominë dhe për zhvillimin e vendit të integrohet me ritme më të shpejta në Bashkimin Evropian.

Duke folur për Procesin e Berlinit, Ministri Haxhinasto e cilësoi këtë Strategji në përputhje me qëllimet e këtij procesi dhe u ndal tek Samiti i 4 Korrikut në Paris, ku u arritën edhe produkte konkrete përsa i takon infrastrukturës hekurudhore në vendin tonë, në miratimin e projektit të rëndësishëm të rehabilitimit të infrastrukturës hekurudhore Tiranë-Rinas-Durrës. Në këtë Samit, Bashkimi Evropian miratoi grantin prej 35 ml eurosh, si pjesë e zbatimit të projektit prej 82 ml euro, që do të sjelli një situatë krejtësisht tjetër në lidhjen e zemrës ekonomike dhe administrative të vendit, që është zona Tiranë-Durrës.

Haxhinasto tha se strategjia ka marrë parasysh zgjidhjen e sfidave që ka sistemi ynë i transportit: “Duke filluar me bazën ligjore përkatëse, duke vazhduar me një lidhje organike dhe një reflektim të kërkesës së sotme dhe të ardhshme përsa i takon zhvillimit ekonomik, si një sektor jo vetëm që gjeneron vlerë, por i shërben kësaj ekonomie për të realizuar rritjen dhe zhvillimin e saj”.

Në fjalën e tij, Ministri u ndal gjithashtu tek cilësia e shërbimit të cilën e konsideroi një prioritet strategjik dhe si shumë e rëndësishme është tërësia e masave që integrojnë transportin jo vetëm në aspektin fizik por edhe masat buta, për të liberalizuar tregun.

Në planifikimin e investimeve është përdorur metoda e priotarizimit të projekteve infrastrukturore. Ajo i krijon mundësi reale investitorëve privatë për të konsideruar investime serioze në infrastrukturën e vendit, duke pasur një dokument vlerësues të të gjithë projekteve me interes kombëtar dhe rajonal, të vlerësuar sipas metodologjive Evropiane.

“Ka ardhur momenti që strategjia duhet të jetë e vetmja pikë reference, me qëllim që të bëjmë dhe ne planifikimin buxhetor, duke i dhënë infrastrukturës peshën e duhur specifike që ka qoftë në rritjen ekonomike qoftë në detyrimet e tjera në kuadër të detyrimeve ndërkombëtare që kemi”, nënvizoi ministri.

ma.me