Ministri i Transportit dhe Infrastrukturës, Edmond Haxhinasto deklaroi sot se masat e marra nga qeveria kundër informalitetit në transportin rrugor kanë rritur ndjeshëm sigurinë rrugore. Në konferencën “Standardet e sigurisë rrugore në Bashkimin Europian, pikë referimi për Shqipërinë”, që po zhvillon punimet në Tiranë, Haxhinasto tha se ndërhyrjet në Kodin Rrugor forcuan masat por edhe përmirësuan sjelljen e qytetarëve në rrugë. Lidhur me ndërhyrjet e bëra nga MTI, Haxhinasto u ndal tek disa prej tyre, si ndërhyrjet për patentat, perfeksionimin e sistemit të patentimit, apo masa të tjera për shërbime më të mira në këtë fushë.
Duke u ndalur në disa prej tyre, të cilat sipas ministrit kanë patur edhe ndjeshmëri publike, siç është çështja e gjobave, Haxhinasto tha se gjobat në vetvete nuk prekin qyetarin që respektojnë rregullat. “‘Për ata që zgjedhin të shkelin rregullin e të futen në kryqëzim me dritë të kuqe, sigurisht do të ketë pasoja, sepse kjo pasojë nuk lidhet vetëm me ta, por edhe me jetën e të tjerëve”, deklaroi ministri.
Efekti i këtyre masave, sipas tij, është evident, pasi nuk shihen më drejtues mjetesh të futen në semafor me dritë të kuqe, kur vetëm pak kohë më parë ka qënë një sport shumë i ‘këndshëm’ për ta. Një tjetër çështje e ngritur nga ministri ishte edhe përdorimi i rrugës si aset. “Infrastruktura rrugore në vend është aset kombëtar, pasi është ndërtuar me kontributin e të gjithë qytetarëve”, tha ai. Këtu, ministri kërkoi ashpërsimin e masave për të gjithë ata që ndërhyjnë në rrugë në mënyrë të paautorizuar, pasi sipas tij, kompromentojnë shumë rëndë sigurinë rrugore.
Ministri po ashtu bëri të ditur se në rrugë është bërë një investim i jashtëzakonshëm. Sipas tij, rreth 3.7 miliardë dollarë janë investuar në vitet e fundit në sistemin rrugor. Më tej, ai renditi edhe disa nga akset rrugore në të cilat është ndërhyrë duke përmirësuar edhe sinjalistikën. Konkretisht, në akset Rrogozhinë-Butrint-Qafa e Llogarasë dhe Tiranë-Kashar-Rinas, Ndërsa, sipas tij, po punohet në segmentet Rrogozhinë-Elbasan-Qafë Thanë-Kapshticë dhe Fushë Krujë-Shkodër-Hani i Hotit-Muriqan. Haxhinasto po ashtu i kërkoi Autoritetit Rrugor Shqiptar të rrisë masat ndëshkimore për ata që dëmtojnë veprat e artit në trupin e rrugës.
ma.me
