Ministri për Europën dhe Punët e Jashtme, Igli Hasani ka përforcuar qëndrimin e Tiranës zyrtare ndaj ngjarjeve në Banjskë të Zveçanit, duke theksuar se Kosova do të ketë gjithmonë mbështetjen e Shqipërisë. Hasani theksoi nga foltorja e Kuvendit se Shqipëria do t’i japë zë Kosovës në çdo hapësirë e platformë ndërkombëtare.
“Do vijojmë të mbështesim Kosovën për t’i dhënë zë në çdo hapësirë ku mundemi”, tha ai.
Ministri i Jashtëm dënoi sërish qëndrimin e Serbisë lidhur me ngjarjet në veri, duke theksuar se shpallja e zisë kombëtare ishte sinjali më i rrezikshëm që mund t’i jepte rajonit.
Ai ka kërkuar që Beogradi të reflektojë dhe dënojë aktin terrorist duke treguar në këtë mënyrë vullnet për shtensionim të situatës.
“I takon Serbisë të bëjë një proces hetimi të thellë dhe serioz”, tha ai.
Në përfundim, Hasani nënvizoi se rruga e vetme e duhur për dhënien fund të tensioneve është dialogu, ndaj ftoi palët që të përkushtohet për gjetjen e një zgjidhjeje në dobi të tyre.
/a.r
