Presidenti i Teutës, Edmond Hasanbelliu, nuk është ndier aspak mirë nga akordimi i një 11-metërshi të paqenë siç pretendon ai në ndeshjen që skuadra e tij luajti dje ndaj Kukësit në transfertë. Në një prononcim për “Panorama Sport”, numri një i durrsakëve ka bërë me dije se klubi i Teutës do të marrë masa ligjore për të vënë para drejtësisë gjyqtarin kryesor të ndeshjes, Kridens Meta.
“Për këta arbitra ne mund të vendosim të bojkotojmë kampionatin. Nesër (sot) do të shkojmë në Prokurori për të denoncuar arbitrin për marrje ryshfeti, pasi dyshojmë për një gjë të tillë. Ai e bëri me dashje këtë veprim. Ne do të shkojmë nesër (sot) në Prokurorinë e Durrësit, do të denoncojmë arbitrin për marrje ryshfeti dhe dhënie penalltie të paqenë dhe me dashje”, ishin fjalët e Hasanbelliut, jo pak i mërzitur nga penalizimi që i është bërë ekipit të tij në takimin e djeshëm. Ishte pikërisht goli i Pejiçit nga pika e bardhë që i hapi rrugë fitores së Kukësit.
Dënimi
Por vendimi më drastik, që presidenti i Teutës shprehet se do të marrë, është ai i bojkotit të kampionatit nga ekipi i tij. Një masë e tillë do të vijë në rast se komisionet përkatëse nuk e dënojnë kryesorin Meta rëndë. “Nëse komisionet tona të Federatës Shqiptare të Futbollit i japin një nga ato dënimet e lehta këtij gjyqtari me një ose dy ndeshje pezullim, do të bojkotojmë kampionatin. Janë duke u tallur. Kemi lënë edhe festën e Kurban Bajramit për të parë këtë ndeshje të ekipit tonë dhe të na ndëshkojë një maskara, një hajdut ordiner është një problem i madh”, ka mbyllur presidenti Hasanbelliu deklaratën e tij për gazetën, duke hedhur akuza mjaft të rënda në drejtim të arbitrit që drejtoi takimin e djeshëm mes Kukësit dhe Teutës.
Panorama/d.i.
