Kryetari i Grupit të PS, Taulant Balla tha sot (8 shtator) se ende po vijojnë konsultimet në çdo qytet të vendit, lidhur me hartën e re territoriale.
Për mediat, Balla u shpreh se do të pritet afati 60 ditor, teksa vlerësoi punën e bërë nga komisioni për reformën territoriale.
Balla shtoi se në thelb të reformës ka qenë përmirësimi i shërbimit ndaj qytetarit.
“Ka një afat, për konsultimin, të përfundojë 60 ditë nga marrja e njoftimit. Në rastin në fjalë janë këshillat bashkiakë, qytetarët pyeten përmes zgjedhjeve. Prania besnike na ka bërë të dëgjojmë. Qytetarët kanë mandatuar Kuvendin për të marrë vendime, ka shumicë në Kuvend. Do presim afatin 60 ditor, komisioni ka bërë punë të shkëlqyer, ka qenë proces model. Shpresoj që një ndër sfidat, përveç detyrës për ta përmbyllur këtë hap, sepse siç bëmë në 2014, kjo është reformë më e vogël, në thelb ka qenë përmirësimi i shërbimit ndaj qytetarit”, theksoi kreu i grupit të PS-së.
