Reforma në Drejtësi ka futur në kolaps sistemin gjyqësor. Shkarkimi i një numri shumë të madh të gjyqtarëve ka bërë që më mijëra dosje të mbeten pa u shqyrtuar nga trupat gjykuese. Për t’i dhënë zgjidhje kësaj situate Këshilli i Lartë Gjyqësor, më 20 Shtator të vitit të shkuar i propozoi Ministrisë së Drejtësisë Etilda Gjonaj hartën e re gjyqësore.
Këshilli i sugjeroi Gjonajt, që nga 22 gjykatat e rretheve gjyqësore me juridiksion të përgjithshëm, 6 gjykatat Administrative të Shkallës së Parë dhe 6 gjykatat e Apelit të riorganizohen në 12 gjykata me juridiksion të përgjithshëm dhe 2 gjykata administrative në shkallë të parë dhe 1 gjykatë Apeli.
Si shkallë e dytë për të gjitha ankimet do të shërbejë Gjykata e Apelit në Tiranë, e cila aktualisht ka në sirtarë rreth 15 mijë dosje që datojnë që nga viti 2016. Por edhe pse kanë kaluar gati 10 muaj Ministria e Drejtësisë nuk ka reaguar në lidhje me propozimin e bërë nga qeveria e gjyqtarëve duke vënë në vështirësi shumë gjykata të cilat janë thuajse të boshatisura nga togat e zeza.
Disa ditë më parë, Naureda Llagami, drejtuesja e KLGJ-së raportoi në Komisionin e Ligjeve se harta e re do t’i shërbejë rritjes së eficiencës së gjykatave, përmirësimit të shpejtësisë së gjykimit dhe aksesit në drejtësi të qytetarëve. Llagami tha se Ministria e Drejtësisë nuk kishte të njëjtën qasje sikurse Këshilli, duke shkaktuar zvarritje të procesit, e cila ka pasur një ndikim negativ për sistemin gjyqësor.
Drejtuesja e KLGJ-së theksoi faktit që është shumë e vështirë që të komandojnë gjyqtarë në apelet e rretheve pasi numri i tyre është shumë i ulët. Kundër propozimit të KLGJ ka reaguar edhe Dhoma e Avokatisë Korçë. Ata theksojnë se mbylla e Gjykatës së Apelit në këtë qytet nuk i shërben dhënies së drejtësisë efektive.
/a.r
