Harta e re gjyqësore është në fazat e fundit dhe pas miratimit edhe nga Ministria e Financave do të kalojë për miratim në Këshillin e Ministrave. Gjatë një prononcimi për media, ministri i Drejtësisë Ulsi Manja la të kuptohet se harta e re gjyqësore do të miratohet, pa i bërë asnjë ndryshim. Manja theksoi se kanë një ditë të caktuar për diskutime dhe se të mërkurën në Komisionin e Ligjeve do të japin sqarime të detajuara.
“Do shkojmë në respekt të Komisionit të Ligjeve dhe Kuvendit të Shqipërisë të japim shpjegimet tona. Harta është bërë tashmë e ditur, bashkëpropozimi ynë për hartën. Pas asaj seance dëgjimore nesër në Komisionin e Ligjeve dhe pasi të administrojmë edhe opinionin e Ministrisë së Financave lidhur me kostimin e hartës, do të shkojë në qeveri për miratim”.
Avokatët prej kohësh kanë bojkotuar seancat gjyqësore në shenjë revolte për miratimin e hartës së re gjyqësore ku shkrihen 18 gjykata. Ata kërkojnë që të mos ketë vetëm një gjykatë Apeli me juridiksion të përgjithshëm sepse do të ketë rritje të shpenzimeve gjyqësore. Do të ketë vështirësi që qytetarët të kenë akses në drejtësi. Gjithashtu do të cenohen liritë dhe të drejtat themelore të qytetarëve.
Në të dyja mbledhjet e Dhomës së Avokatisë të datës 29 Qershor dhe 8 Korrik, ata kanë vendosur që të bojkotojnë seancat gjyqësore edhe masat e sigurisë për 10 ditë. Të enjten avokatët kanë paralajmëruar protestë para Këshillit të Lartë Gjyqësor.
/a.r
