Ish-kryeministri i Kosovës dhe kryetari i Aleancës për Ardhmërinë e Kosovës, Ramush Haradinaj, i bëri thirrje sot deputetëve kosovarë të mos e votojnë demarkacionin me Malin e Zi.
Në një prononcim për agjencinë e lajmeve “Presheva Jonë”, Haradinaj theksoi se “kufiri me Malin e Zi është në Cakorr dhe në Kullë e jo në Kuqishtë e Cerinovodë. Pra kufiri është në qafën e Cakorrit, majat e larta në Kullë, majat e larta në bjeshkët e Podgurit. Pushtetarët i kanë mashtruar qytetarët dhe miqtë tanë me një version të gabuar, ky version duhet të bie në parlament, për ata që ndjenjën për atdhe e kanë të shenjtë edhe kufiri është i shenjtë”.
Kreu i AAK-së, u shpreh se nuk duhet lejuar në asnjë mënyrë dhe kërkoj prej deputetëve e apeloj tek të gjithë ata që e kuptojnë se bëhet fjalë për diçka që është e shenjtë, sublime që të mos e votojnë këtë version të gabuar””.
Sipas medias kosovare deputetët e Kuvendit të Kosovës në seancën e së enjtes në 6 prill do të votojnë pro ose kundër marrëveshjes së demarkacionit me Malin e Zi. Ratifikimi i Marrëveshjes për përcaktimin e vijës kufitare me Malin e Zi është kusht për liberalizimin e vizave për qytetarët e Kosovës.
