Ramush Haradinaj ka sulmuar ashpër përmes një postimi në rrjetin e tij social presidentin Thaçi dhe kryeministrin Isa Mustafa, duke i cilësuar si kukulla të Serbisë, për faktin se sipas Haradinajt, është e papranueshme që nën prizmin e sulmeve të njëpasnjëshme të serbëve, Kosova zyrtare të pranojë të ulet në tavolinë me palën serbe për të dialoguar.
POSTIMI
Përcaktimi i Hashim Thaçit e Isa Mustafës, që pavarësisht rrethanave të krijuara nga sulmet e njëpasnjëshme të Serbisë mbi sovranitetin e Kosovës, të vazhdojnë bisedimet me Serbinë, është pozicion i kukullave.
Që të ulësh në një tavolinë bisedimesh me Serbinë, që po i shkakton kaq shumë dëme Kosovës, kjo edhe përmes sulmeve e marifeteve të fundit, siç janë muri, treni dhe fletarrestet e sajuara, do të thotë të mos e kuptosh interesin e shtetit tënd.
Të pranosh të ulesh e të dialogosh me Serbinë, në këto rrethana e në kohën e një kundërshtimi kaq të madh popullor kundër një dialogu pa kushte, do të thotë të mos e përfaqësosh popullin.
Ndërkaq sa i përket deklarimeve të prokurorëve e të politikanëve serbë për rastin tim, i porosis të gjithë ata, se kryeqyteti im nuk është Beogradi!/java/a.k
