Ish-kryeministri Ramush Haradinaj ka reaguar pas tensioneve në veri të Kosovës, aty ku ka pasur të shtëna me armë dhe përplasje mes policisë e protestuesve serbë.
“Tensionet në veri janë të papranueshme”, kështu shkruan Haradinaj në një postim në Facebook.
Ndër të tjera shtoi se aktet e dhunës dhe sulmet ndaj policëve janë të dënueshme. Ndër të tjera u bëri thirrje serbëve të mos bien pre e interesave të Vuçiç-it.
Postimi i plotë i Ramush Haradinaj:
Tensionet në veri janë të papranueshme! Sulmet dhe lëndimi i policëve janë akt i rëndë dhune dhe si të tilla janë të dënueshme. Serbët lokalë të heqin dorë nga dhuna dhe të mos bijnë pre e interesave politike të Aleksandër Vuçiqit, të cilit edhe ashtu po i lëkundet pushteti.
Kryeministri i Kosovës nga ana e tij, të jetë maksimalisht i kujdesshëm dhe të mos ndërmarrë veprime të pakoordinuara me partnerët ndërkombëtarë.
Ngërçi politik me serbët lokalë të Kosovës në atë pjesë, mund të zgjidhet vetëm me dialog të hapur me ta. Kosova nuk e ka luksin të veprojë e vetme dhe e pakoordinuar me miqtë ndërkombëtarë në kapërcimin e gjendjes së krijuar në veri.
Apeloj tek qytetarët serbë dhe tek institucionet e Kosovës që të bëjnë të pamundurën në qetësimin e situatës.
