Kryeministri i Kosovës, Ramush Haradinaj, zhvilloi një takim sot me zëvendëskryeministrin dhe ministrin e Jashtëm të Sllovenisë, Karl Erjavec.
Sipas njoftimit të Zyrës së Kryeministrit të Kosovës, Haradinaj tha se “ekziston një klimë e mirë mes Kosovës dhe Sllovenisë për bashkëpunim në shumë fusha”.
“Sllovenia është një ndër investitorët më të mëdhenj në vend dhe Kosova është e interesuar që ta vazhdojë këtë partneritet ekonomik”, tha Haradinaj, duke kërkuar vazhdimin e përkrahjes së Sllovenisë në planin ndërkombëtar, raporton rel.
“Përkrahja juaj për njohjet e reja, anëtarësimin në INTERPOL, UNESCO, në procesin e integrimit euroatlantik ka domethënie të madhe për ne”, tha Haradinaj.
Me këtë rast, ai shtoi se krijimi i ushtrisë së Kosovës me mandat kushtetues, nuk e ndryshon balancën e sigurisë në rajon, porse për më tepër kontribuon në të.
Ministri slloven, në anën tjetër, vlerësoi, siç tha, arritjet dhe progresin e madh që është bërë në Kosovë në këta 10 vjet të shtetësisë, duke shprehur gatishmërinë dhe përkushtimin e vendit të tij për bashkëpunimin dypalësh.
a.ç
