Protesta e Vetëvendosjes, e paralajmëruar me datën 1 shtator, si duket nuk do të ketë përkrahjen e partive tjera opozitare.
Së paku zyrtarisht dy partitë opozitare, AAK dhe Nisma, nuk kanë dhënë shenja që do të marrin pjesë në këtë protestë.
Deputeti i AAK-së Daut Haradinaj i pyetur nga Botapress se përse nuk do të marrin pjesë në protestat e organizuara nga Lëvizja Vetëvendosje me datën 1 shtator dhe a do të thotë kjo se AAK është pro Demarkacionit apo fjala është për inate politike ndaj Vetëvendosjes, Haradinaj tha se nuk kanë qenë të informuar për këto protesta e as pjesë e organizimit të tyre.
“Ne nuk kemi qenë pjesë e konsultave dhe nuk jemi pjesë e organizimit të këtyre protestave. Qytetarët vendosin vetë nëse do të marrin pjesë apo jo, por si parti politike nuk jemi pjesë e organizimit, dhe nuk ka të bëjë kjo as me inate as me qejfe të askujt.
Ata që duan ta dijnë, e dinë se cili ka qenë dhe cili është angazhimi ynë për kundërshtimin e demarkacionit” ka thënë Haradinaj, citohet Koha. (b.an)
