Kuvendi i Shqipërisë do të shqyrtojë në seancën e nesërme dy projektligjet “për hapjen e dosjeve të ish-Sigurimit të Shtetit”, të propozuar nga qeveria dhe nga shoqëria civile.
Kjo u bë e ditur nga Ministri i Mirëqënies Sociale Erion Veliaj gjatë prezantimit të Panairit të Punës, ku bëri të ditur se në ditën e fundit të postit të tij si ministër do të shqyrtohen edhe projektligjet për hapjen e dosjeve.
Kjo është pasqyruar edhe në rendin e ditës së parlamentit në faqen zyrtare.
Drafti i shoqërisë civile është rrëzuar nga mazhoranca gjatë shqyrtimit në komisionet parlamentare, ndërsa projekti i qeverisë, ka pësuar ndryshime.
Ligji i ri parashikon që ky proces të bëhet nga Autoriteti i Informimit Publik, një strukturë me pesë anëtarë, që do të jetë në varësi të Kuvendit. Shqipëria në këtë proces parashikon të ndjekë modelin gjerman, i cili ka rezultuar i suksesshëm. Projektligji merr parasysh vendimet e Gjykatës Kushtetuese për këtë çështje dhe është në respekt të plotë të parimeve të Komisionit të Venecias.
Redaksia Online
(JavaNews.al)
