Procesi i negociatave të anëtarësimit të Shqipërisë në Bashkimin Europian është duke ecur me ritme tepër të shpejta.
Kështu ka deklaruar ambasadori gjerman në Shqipëri, Karl Berger, i cili teksa përgëzoi negociatorët, theksoi se hapja e katër kapitujve të negociatave brenda një periudhe të shkurtër kohore është një arritje e jashtëzakonshme.
“Duhet ta përgëzoj Shqipërinë dhe qeverinë shqiptare për hapjen e katër prej këtyre gjashtë grup-kapitujve në 8-9 muajt e fundit, që nga tetori i vitit të kaluar. Ky është një shans shumë, shumë i mirë. Dhe ajo që mund të shohim në një nivel teknik është se ekipi negociator po bën një punë shumë shumë të mirë sepse tashmë këto katër kapituj në nëntë muaj janë një rekord. Jam shumë, shumë i bindur se me këtë kapacitet të ekipit të tryezës, pjesa tjetër e grup-kapitujve do të hapet deri në fund të vitit. Pra, nga kjo anë, me të vërtetë, duhet të përgëzoj qeverinë, popullin për shpejtësinë”.
Berger gjithashtu theksoi sfidat e Shqipërisë gjatë këtij procesi dhe rëndësinë e forcimit të kapaciteteve administrative për të mbështetur këtë angazhim.
“Përqëndrimi do të jetë te sundimi i ligjit, qeverisja dhe lufta kundër korrupsionit, pasi këto janë disa nga fushat më të rëndësishme që shqetësojnë qytetarët shqiptarë. Jam i sigurt se Shqipëria mund të arrijë objektivat e saj dhe se do të vazhdojë të mbështetet nga Gjermania në këtë rrugëtim”.
Nisur pikërisht nga ky përparim, ambasadori Berger shprehu besimin se Shqipëria do të arrijë të realizojë objektivat e saj në rrugën drejt familjes europiane.
