Të shtëna me armë zjarri janë regjistruar pasditen e sotme në afërsi të Stadiumit të Beratit. Tre persona të armatosur kanë hapur zjarr në drejtim të një lavazhi, por fatmirësisht nuk ka pasur të lënduar. Sipas mediave informative, në pranga kanë rënë shtetasit Vladimir Spahiu, Xhoni Spahiu, dhe një person me inicialet P.S.
Të dyshuarit si autorë të ngjarjes, kanë qenë duke lëvizur me një automjet, në kohën kur kanë qëlluar me pistoletë të tipit ‘TT’ në drejtim të Lavazhit, dhe më pas janë larguar me shpejtësi.
Por tentativa e arratisjes ka dështuar, pasi policia ka mundur t’i ndalojë në aksin Zog-Poliçan.
Sakaq, policia ka sekuestruar armën dhe një karikator të fshehur në një çantë, ndërsa grupi hetimor po punon për zbardhjen e plotë të rrethanave të ngjarjes.
