Kreu i grupit demokrat Myslim Murrizi do të ridërgojë propozimin e opozitës parlamentare për hapjen e listave në seancën e 5 tetorit. Në një intervistë për Report tv, Murrizi tha se vota e opozitës do të varet nga drafti final që do votohet në seancë, ndërsa për punën e Komisionit të Posaçëm për KQZ Murrizi akuzoi PD dhe LSI se punuan pa seriozitet.
“Në Kuvend ne do të ripropozojmë amendamentin e propozuar në emër të 11 deputetëve, për nenin 163 që është thembra e Akilit, që është zbatimi i Kushtetutës në kod, hapja e listave jo më pak se 2/3, që nuk është implementuar te propozimi i PS. Do shohin draftin final në seancë, për të parë dhe çfarë do të bëhet me votën tonë. Shpresojmë që PS këto dy ditë të reflektojë dhe të heqë herësin”, tha Murrizi. Sfida e radhës për mazhorancën është sigurimi i votave nga deputetët e opozitës parlamentare për të votuar në seancë paketën me ndryshimet në kodin Zgjedhor.
“Unë nuk jam as komandant apo lider supreme i opozitës, as tutor as protektor. Përgjegjësi morale mbaj për votën time, por dhe për grupin parlamentar që unë drejtoj. Për dy grupet e tjera nuk është përgjegjësi e imja. Në komision deputeti Zeneli ka votuar pragun 1%, një kërkesë e jona. Ne kërkuam që kryetari i Partisë të kandidojë në 12 qarqe, për të maksimalizuar numrin e votave për partinë”, tha Murrizi.
Si anëtar i Komisionit të Posaçëm për përzgjedhjen e kandidatëve të KQZ-së, Myslim Murrizi e quajti një gabim përjashtimin nga PD të Ilir Rusmajlit për të qenë në krye të KQZ-së së re. Teksa njoftoi për tërheqjen e Odeta Berberit si anëtare e rregullatorit, Murrizi akuzoi PS-PD për procesin e realizuar deri më tani.
“Njëra nga të propozuarat e mazhorancës ka dhënë dorëheqjen. I zgjedh pa i pyetur ose ua zgjedhin pa i pyetur. Të zgjidhesh në 18:30 dhe të japësh dorëheqjen në orën 09:30 kjo tregon seriozitetin e dy partive që kanë nënshkruar mbajtjen në pronësi të KQZ-së për interesa të ngushta. Të pranosh Ilirian Celibashin si kandidaturë për të drejtuar KQZ, apo një deputet të PS dhe të eliminosh zv kryeministrin e PD, kjo tregon atë që unë kam thënë prej kohësh që këta janë një ndërmarrje bashkë, filial i PPSH dhe pjellë e komunizmit”, u shpreh ai. Report TV
