Ministri i Bujqësisë dhe Zhvillimit Rural, Bledi Çuçi, ishte sot në Konispol, ku u organizua festa e përvitshme e mandarinës. Ky event kishte mbledhur së bashku fermerë të zonës, tregtarë, eksportues dhe vizitorë të tjerë. Në fjalën e mbajtur para banorëve, ministri Çuçi tha se në këtë zonë prodhimet bujqësore janë rritur si askund tjetër dhe kjo natyrisht që përbën një histori suksesi. Sot prodhimet bujqësore të kësaj zone eksportohen në tregjet e huaja.
“Nëse ka një zonë në Shqipëri e cila është histori suksesi dhe model për t’u aplikuar në çdo vend tjetër përsa i përket kooperimit të fermerëve, rritjes së prodhimit edhe eksportit në tregjet e huaja, padiskutim që është Konispoli, është Xara dhe të gjithë fshatrat përreth. Si në çdo vit tjetër edhe kësaj here vjelja e mandarinave nisi me festë. Dikur në këtë zonë prodhimet bujqësore ishin vetëm 2 mijë ton, ndërsa sot arrijnë deri në 40 mijë ton. Ky është një tregues domethënës për potencialin e madh që ka sektori bujqësor i kësaj krahine, por edhe i punës së fermerëve që kanë ditur të shfrytëzojnë mjeshtërisht tokën dhe klimën fantastike”, u shpreh ministri i Bujqësisë.
Më tej ai tha vitin tjetër nis rehabilitimi i kanalit të Janjarit, investim që do t’i japë fund problemit të vaditjes në këtë zonë. Ndërkohë që ka nisur edhe puna për ndërtimin e rrugës Xarë-Shkallë.
“Dy lajme të mira për banorët e Konispolit. Së pari kemi nisur ndërtimin e rrugës që lidh Xarën dhe Shkallën, investim ky shumë i rëndësishëm për të lehtësuar qarkullimin e njerëzve dhe prodhimeve bujqësore. Së dyti, vitin tjetër do të investojmë rreth 9 milionë dollarë për rehabilitimin e kanalit të Janjarit, i cili do të zgjidhë përfundimisht problemin e vaditjes së gjithë tokave të kësaj zone. Ne do të vazhdojmë të shtojmë investimet dhe të mbështesim fermerët në çdo zonë të vendit sepse bujqësia mbetet një nga sektorët më të rëndësishëm të ekonomisë tonë”, tha ministri i Bujqësisë dhe Zhvillimit Rural.
g.kosovari
