Në çeljen e Panairit të Punës për këtë vit, Kryeministri Rama dha disa shifra në lidhje me punësimin dhe punëkërkuesit, duke thënë se më shumë se gjysma e atyre që i drejtohen zyrave të punësimit deklarohen si pa profesion dhe pa arsim të mesëm, në kushtet kur gjysma e punëve që janë në dispozicion kërkojnë të paktën këto dy kushte. Kryeministri tha se Panairi i Punës së këtij viti ka në dispozicion 8 mijë vende të reja pune dhe se qeveria do të investohet që të bëjë të mundur edhe trajnimin e punëkërkuesve, në kushtet kur sipas Kryeministrit, Shqipëria ka punë, por nuk ka profesionistë.
“Panairi është një hapësirë informacioni për të kuptuar se çfarë po ndodh sot në tregun e punës dhe për të parë nga afër se si miti se ka punë për vetëm ata që pranojnë të paguhen shumë pak, në fakt është i pavërtetë.
Këtë vit panairi ka risinë e bashkëpunimit mes Ministrisë së Mirëqënies dhe Bashkisë së Tiranës.
Nga 70 në vitin e kaluar, sot janë mbi 130 sipërmarrje të suksesshme, që janë në zgjerim të vazhdueshëm që vijojnë të kërkojnë njerëz të kualifikuar.
Në këtë hapësirë janë në dispozicion të punëkërkuesit 8 mijë vende pune, që nga sektori i telekomunikacioneve dhe shërbimeve, tek sektori përpunues i idnustrisë ushqimore, e deri tek industria ushqimore.
Shqipëria ka punë, por kërkohen punonjës të kualifikuar. Ne kemi shumëfishuar fondet për rritjen e punësimit dhe nga ana tjetër, kemi objektivin që të 7-fishojmë të punësuarit nga ky program.
Ajo që është për të ardhur keq, është se 55% e njerëzve të regjistruar si të papunësuar janë me arsim 8 vjeçar dhe pa asnjë profesion, ndërkohë që më shumë se 50% e punëve janë për teknikë të mesëm dhe të lartë.
Është e qartë që edhe për këta njerëz duhet të ketë një ftesë dhe prandaj kemi hapur arsimin profesional. Ne do të investojmë seriozisht në trajnimet 6 mujore të punëkërkuesve.”- tha Rama.
