Garë me veten e ka konsideruar Ministri i Mirëqënies Erion Veliaj çështjen e punësimit në Shqipëri duke folur sot në Panairin e Punës që është hapur në Pallatin e Kongreseve. Në prani edhe të kreut të Kuvendit Ilir Meta, Veliaj nisur nga rezultatet e arritura deri më tani, ka theksuar se sfida për qeverinë shqiptare sa i përket punësimitt ë shqiptarëve është me vet standardet që ajo ka vendosur dhe jo me paraardhësit.
“Nëse kam një porosi për atë që do marrë stafetën në këtë ministri, është që gara jonë është me standardin që ndërtuam tani, gara jonë është me këtë panair pune, me 10 zyrat e punës, me fondin e nxitjes së punësimit. Kjo është gara për të cilën ne duhet të luftojmë dhe ne këtë gara jonë është me veten dhe me ambicien tonë”, – tha ministri Veliaj në fjalën e tij në hapjen e këtij panairi.
Më tej ministri Veliaj Erion Veliaj u shpreh se ky panair ofron afro 5 mijë vënde pune në sektorin privat, ndaj ka ftuar të gjithë të interesuarit, kryesisht të rinjtë e diplomuar, apo ata që kanë një zanat dhe që janë në kërkim të një vendi pune, të vizitojnë stendat e kompanive që janë bërë pjesë e tij.
“Ka disa mënyra sesi ne i përqasemi situatës jo të lehtë ku gjendet çështja e punësimit dhe ekonomisë. Një mënyrë është që ne të shajmë dhe të përqeshim gjithçka. Unë them që ka një mënyrë tjetër që ti përgjigjemi çdo sfide duke bërë diçka, ndaj dhe më vjen mirë që shërbimi kombëtar i punësimit nuk i bashkohet korrit stupcave, por i bashkohen atyre njerëzve që thonë ne mund të bëjmë diçka, ne mund ta formalizojmë tregun e punës, ne mund të ndërtojmë këtu një agora apo një piacë ku takohet punëdhënësi dhe punëmarrësi për ti ofruar si buqetë vëndet e punës”, – tha më tej z.Veliaj.
Ai gjithashtu ka dhënë dhe një lajm të mirë për të gjithë ata qytetarë shqiptar që kanë punuar dhe jetuar në Gjermani, të cilëve do tu njihen vitet e punës për efekt pensioni. “Sapo është mbyllur në Berlin të Gjermanisë, negociata e fundit për marrëveshjen e pensioneve me Gjermanë. Dhe besoj që pas kësaj negociate teknike homologu gjerman do jetë këtu në vjeshtë për të firmosur pasardhësin tim marrëveshjen për njohjen e pensioneve të atyre qytetarëve shqiptarë që jetojnë dhe punojnë në Gjermani që tashmë me këtë marrëveshje të transferojnë vitet e tyre të pensionit dhe që asnjë vit pune të mos iki dëm”, – tha ministry Veliaj.
Ndërkohë kryetari i Kuvendit Ilir Meta duke përshëndetur Panairin, ka vlerësuar punën e bërë nga Veliaj në krye të ministrisë së MSR-së, duke veçuar reformën me zyrat e punës dhe atë të nxitjes së punësimit. “Është tregues i një serioziteti, i një angazhimi konkret për të ndërmarë të gjitha ato reforma që tregojnë në mënyrë më të qartë që qeveria çështjen e punësimit e ka prioritet kryesor, prioritet numër një. Rrezultatet natyrisht do të kërkojnë kohën e tyre, ashtu si dhe rimëkëmbja ekonomike. Zyrat e punës janë shndëruar në instiucione të vërteta, duke fituar besimin e atyre që kërkojnë punë, janë kthyer në zyra pune model”, – tha z.Meta.
Reforma në punësim ka qënë një nga prioritetet e MMSR dhe përgjatë këtyre 18 muajve është bërë një punë e konsiderueshme në hapjen e 12 zyrave të reja të punës, si ura lidhëse mes punëkërkuesve dhe punëdhënësve, apo rritja dhe përdorimi më me efikasitet i fondit të nxitjes së punësimit. Natyrisht një punë e madhe është bërë edhe në aspektin e zbardhjes së vëndeve të punës dhe futjen e tyre në sistemin e sigurimeve shoqërore. Në total përgjatë vitit të shkuar u rrit me 93 mijë numri i personave të siguruar në rregjistrat e ISSH-së, nga të cilat një pjesë e mirë janë të punësuar në vënde të reja pune.
