Qeveria do të mbështesë financiarisht të gjitha ato investime dhe sipërmarrje që rrisin eksportet në bujqësi dhe iniciativat që përmirësojnë më tej cilësinë e prodhimit vendas.
Kryeministri Edi Rama vizitoi sot stendat e panairit “Shqipëria punon tokën”, një panair mbarëkombëtar që e shndërroi Tiranën në një vendtakim të produkteve shqiptare.
Në një bashkëbisedim me sipërmarrësit vendas, kryeministri Rama theksoi se “nga fillimi i vitit të ardhshëm Fondi i Mbështetjes, që kalon përmes Agjencisë së Zhvillimit Bujqësor dhe Rural, do të ketë një zë të veçantë për të rinjtë që kanë një ide apo projekt dhe që kanë vendosmërinë për të investuar duke e nxjerrë fitimin nga toka”.
Po ashtu, një pjesë e veçantë e këtij fondi, sipas kryeministrit, do t’i dedikohet inovacionit në bujqësi.
“Ne duam t’i japim një nxitje të mëtejshme bujqësisë dhe për këtë kemi vënë edhe buxhetin më të madh që ka financuar ndonjëherë qeveria shqiptare, për mbështetjen e bujqësisë. Por, ne duam të fokusohemi tek të gjitha ato investime, sipërmarrje që rrisin eksportet dhe krijojnë vlerë të shtuar dhe te iniciativat që rrisin më tej cilësinë e prodhimit vendas”, tha Rama.
Kryeministri shtoi se “do të ndahemi përfundimisht nga epoka e lëmoshave që e thërrmojnë dhe nuk sjellin mbrapsht asnjë vlerë të shtuar nga fondi, që mbetet modest për nevojat tona”.
“Qeveria do të financojë vetëm në kultura të caktuara që sjellin vlerë të shtuar përmes eksportit në radhë të parë dhe stimulojnë më tutje rritjen dhe zinxhirin e vlerës”, theksoi ai.
”Vitin e ardhshëm”, sipas kreut të qeverisë, ”ky panair do të jetë shumëfish më i madh, por ky i pari do të shënohet si pika e parë e rëndësishme e këtij zinxhiri të ri vlere, që ne do të krijojmë bashkarisht në 4 vitet e ardhshme”. /b.d
