Shkolla “Laboratori i turizmit”, e cila do të ofrojë standarde të larta në shërbimin ndaj turizmit, hapi sot dyert për të rinjtë e apasionuar pas shërbimeve në hoteleri turizëm.
Kjo shkollë është një projekt i rëndësishëm, për të cilin bashkia Vlorë ka vënë në dispozicion një godinë përgjatë Lungomares, e cila deri dje përdorej si zyrë magazinimi për objekte të ndryshme, në pronësi të bashkisë.
Në ceremoninë e përurimit, kryetari i bashkisë së Vlorës, Dritan Leli, theksoi se “jam i bindur që të gjithë së bashku në një bashkëpunim model me bashkinë e Vlorës, Programi i Konvertimit të Borxhit, pranë Ministrisë së Financave (IADSA) dhe Biznes Albania do t’ia dalim të rrisim standardin e shërbimeve turistike në Vlorë për ta bërë këtë sezon Vlorën shembullin e madh të turizmit në të gjithë Shqipërinë”.
“Jo pa qëllim zgjodhëm të ishte dita për të promovuar laboratorin e turizmit, këtë vlerë të shtuar në shërbimin turistik të qytetit për kualifikimin e të gjithë atyre që kanë zgjedhur dhe vazhdojnë të bëjnë biznes në turizëm”-, nënvizoi Leli.
Bashkë me hapjen e laboratorit të turizmit në qytetin bregdetar u çel edhe Panairi i Turizmit , ku marrin pjesë 40 biznese.
“Panairi dhe laboratori i turizmit kanë një lidhje mes tyre sepse në radhë të parë promovojnë bizneset e hotelerisë dhe restorantet dhe na tregojnë sa nevojë kanë për të punësuar njerëz”, – tha Leli duke shtuar se 50 kërkesa për punë u ofruan nga hotelet dhe restorantet pjesëmarrëse në këtë panair.
Kreu i bashkisë së Vlorës u shpreh se “sot do të çelim një tjetër stafetë, sezonin turistik. Do të kemi në Lungomare disa artistë të njohur si ku janë të ftuar shumë këngëtarë Ghetto Geasy, Anxhela Peristeri, Aurel Thellimi, Klajdi dhe Bruno si dhe DJ e njohur, DJ Aldo dhe Bessy DJ. Po ashtu pjesë e koncertit do të jetë edhe Aurela Gaçe, një emër i madh i muzikës”.
Laboratori i turizmit do të shërbejë për të gjithë ata persona që do të japin shërbime në turizëm, për kamerierët, kuzhinierët dhe të gjithë ata që do të punojnë në shërbimet e hoteleri turizmit.
Pjesë e këtij laboratori është një kuzhinë laborator, ku mësuesit do të trajnojnë nxënësit që kanë dëshirë të mësojnë kulinarinë, apo recetat tradicionale. Po ashtu në mjediset e tij është edhe një ambient që është përgatitur me standardin e një dhome hoteli ku studentët që do të vijnë apo ata që punojnë në njësitë e hotelerisë dhe turizmit dhe kanë probleme me cilësinë dhe standardin mund të vijnë të trajnohen pasdite që të marrin një certifikatë.
Restaurimi i godinës u bë i mundur me fonde të Programit të Konvertimit të Borxhit, pranë Ministrisë së Financave (IADSA) në kuadër të projektit SET TOUR LAB (Laboratori i turizmit), i ndodhur pranë Konsullatës italiane në Vlorë.
/a.rada
