10 laboratorë publikë të rinj janë vendosur në funksion, ndërsa pritet që brenda shtator-tetorit të përfundojnë 18 laboratorë në të gjithë spitalet. Lajmin e ka dhënë ministrja e Shëndetësisë Ogerta Manastirliu gjatë inspektimit të laboratorit të ri në maternitetin e Tiranës.
“Rrjeti i 18 laboratorëve publikë ka të njëjtin standard në kryerjen e analizave nga pikëpamja e cilësisë edhe sigurisë së tyre. Edhe për mjekët është shumë më e lehtë, pasi, duke patur analiza të certifikuara në të gjithë spitalet publike nuk ka nevojë të përsëriten analizat dhe çdo gjë është e sigurt, nëse kryhen në Fier, Berat apo në Kukës, kanë të njëjtin certifikim dhe të njëjtin standard. Është një shërbim që u vjen në ndihmë të gjithë qytetarëve, por u shërben edhe mjekëve, sepse kanë garancinë 100%, se çfarë del nga laboratori është e standardizuar në të gjitha drejtimet”.
Sipas Manastirliut deri më tani janë 164 lloje analizash që kryhen në laboratorët publikë.
“Laboratorët e rinj janë të përfshirë në një sistem digjitalizimi, ku ruhen të gjitha analizat e kryera për pacientët dhe mjeku ka informacionin e plotë për pacientët. Shërbimi i ri i laboratorit në Maternitetin “Mbretëresha Geraldinë”, është pjesë e rrjetit modern të laboratorëve publikë, me Partneritetin Publik-Privat, i cili ka rritur gamën e analizave në 164 lloje. Në 18 spitale publike po investohet për ofrimin e shërbimit cilësor dhe zgjerimit të gamës së analizave, duke rritur mbulimin shëndetësor dhe duke reduktuar pagesat nga xhepi për qytetarët. Përmes këtij partneriteti, parashikohet shtim i volumit të analizave me standard dhe siguri të lartë në rrjetin e ri të laboratorëve publikë në vend”.
/b.h
