Komisioni Qendror i Zgjedhjeve ka apeluar sot ekspertët kontabël që të interesohen për të qenë pjesë e monitorimit e shpenzimeve financiare të partive politike, në kuadër të zgjedhjeve parlamentare. Zëdhënësja e këtij institucioni, Drilona Hoxhaj në një deklaratë për mediat bëri publike edhe kushtet që duhet të plotësojë çdo i interesuar.
“Kërkesë aplikimi, dhe deklaratë e nënshkruar nga kandidati lidhur me kriteret e përzgjedhjes të sipërcituara. Pas shfaqjes së interesit nga ekspetët kontabël pranë KQZ-së, përmes një shorti transparent që do të hidhet nga Komisioni Qendror i Zgjedhjeve, do të përcaktohen edhe ekspertët që do të bëjnë monitorimin e fondeve të përfituara dhe shpenzuara nga çdo parti politike gjatë fushatës zgjedhore”, tha zëdhënësja e KQZ-së.
Emërimi i ekspertëve kontabël pritet të bëhet në ditën kur nis zyrtarisht fushata elektorale për zgjedhjet e 25 qershorit, pra në datën 26 maj./a.ç
