Hapet ekspozita italiane e Novecentos, Rama: Vitin e ardhshëm do të sjellim Pikasson

Është hapur këtë të dielë në ambientet e Galerisë së Arteve në kryeqytet ekspozita e kryeveprave italiane të “Novecentos”.

Në fjalën e tij kryeministri Rama është shprehur se ky koleksion është një ushqim i vërtetë për shpirtin.

Madje Rama ka lajmëruar se janë bërë negociata që vitin e ardhshëm të vijë një koleksion origjinal i pikturave të Pikassos.

“Është një thënie që thotë se “rrënjët e atdheut nuk janë në tokë, por në ushqim”. Ushqim nuk është vetëm buka, por edhe kultura që marrim. Pa artin e kulturën evropiane, identiteti ynë nuk është i plotë.

Sa më shumë art e kulturë, ngjarje të tilla, aq më shumë mundësi për krijimin e energjive pozitive te njerëzit dhe për “ushqimin” që thotë ajo fjala e urtë… Kjo nuk është një procedurë e thjeshtë, merr anijen me mallra e silli këtu. Asnjëherë më parë nuk ka ardhur një koleksion i tillë veprash origjinale këtu. Ka më shumë se një vit që përpiqemi për t’ia arritur këtij momenti”, tha Rama.

Në të njëjtën linjë ishte më parë kryetari i Bashkisë së Tiranës, Erion Veliaj,  i cili tha se dëshiron që nxënësit e shkollave të vijnë e ta vizitojnë këtë ekspozitë.

“Falënderoj ata që paguan pará dhe që na krijuan mundësinë të kemi një ekspozitë fantastike, kryeveprat e 900-ës, pasi ne do ta kishim të pamundur, për shkak të kostos, sigurimeve, ndaj falënderoj kompanitë që mundësuan hapjen e saj… Jam profan në këtë fushës, por si gjithë shqiptarët, kur shoh një gjë të bukur më pëlqen. Ndikimi i artit ka ndikim në jetën e qytetit. Aty ku ka art, nuk ka pisllëk. Mjafton të shohim këtu përballë, ku kemi Renë, ku nuk ka pisllëk”.

Të premten pasdite do të kemi një bisedë për të ardhmen e piramidës. Falënderoj të gjithë ata që punuan, që nga kryeministri, deri te ai që ka vënë gozhdën e fundit në këtë ekspozitë.

Ftoj drejtoreshat e shkollave që të mos mbetemi thjesht te ekspozimi i bukurive italiane në Tiranë, por të ekspozojmë fëmijët tanë para  këtyre bukurive. Brezi i ri rritet më i mirë kur shijon këto bukuri”, tha kryebashkiaku. /java/a.k