Autoriteti për Informim mbi Dokumentet e ish-Sigurimit të Shtetit në kuadër të “Ditëve të Kujtesës- Jo më nderim figurave të diktaturës”, po bashkëpunon me pushtetin vendor me qëllim ndërtimin e mekanizmave të bashkëpunimit në disa fusha kyçe.
Në njoftimin për shtyp, AIDSSH bën me dije se me pushtetin vendor do të diskutojnë për gjyqtarët e diktaturës, ish-bashkëpunëtorë të sigurimit të cilët janë nderuar me tituj nderi nga pushtetit lokal.
AIDSSH thekson se fushat kyçe të bashkëpunimit do të jenë verifikimi i figurës së kandidatëve për dekorata, tituj nderi, emërtimin e rrugëve dhe hapësirave publike; trajtimi i vendvarrimeve të dyshuara të ekzekutimeve, varreve të pashënjuara dhe vendeve të kujtesës si dhe bashkëpunimi me institucionet arsimore, bibliotekat dhe muzetë lokalë, për të nxitur edukimin dhe ndërgjegjësimin mbi të kaluarën.
Më herët kryetarja e AIDSSH, Gentiana Sula deklaroi se, “rëndësia e punës sonë qëndron në përkushtimin për të ndihmuar hulumtuesit, historianët dhe të gjithë qytetarët të përvetësojnë një mori dokumentesh që dikur ishin të mbyllura: nga arkivat sekrete të hapura rast pas rasti, deri te ato të deklasifikuara dhe të zbardhura me qasje të papenguar”.
Këto dokumente, dikur të fshehura, sot ekzaminohen dhe ekspozohen për të ndriçuar të vërtetat historike dhe për të mësuar nga e kaluara jonë.
