Hamasi ka pranuar propozimin e ri amerikan për armëpushimin në Gaza. Ai parashikon lirimin e 10 pengjeve izraelitë, qindra të burgosur palestinezë, 70 ditë armëpushim dhe një tërheqje graduale të izraelit nga rripi i Gazës. Sipas mediave në lindjen e mesme, Donald Trump pritet të njoftojë një armëpushim në Gaza këtë javë.
Hamasi ka rënë dakord me një propozim të të dërguarit të posaçëm të SHBA-së, Steve Uitkof për një armëpushim në Gaza.
Lajmi konfirmohet për reuters nga një zyrtar palestinez i afërt me grupin. Sipas agjencisë prestigjoze të lajmeve, pranimi i propozimit, i hap rrugën një fundi të mundshëm të luftës. Propozimi i ri, i cili parashikon lirimin e dhjetë pengjeve dhe 70 ditë armëpushim, u prit nga Hamasi përmes ndërmjetësve.
“Propozimi përfshin lirimin e dhjetë pengjeve izraelitë të gjallë të mbajtur nga Hamasi në dy grupe, në këmbim të një armëpushimi 70-ditor dhe një tërheqje të pjesshme nga Rripi i Gazës”, tha burimi.
Propozimi parashikon gjithashtu lirimin e një numri të burgosurish palestinezë nga Izraeli, duke përfshirë qindra prej atyre që vuajnë burgime të gjata.
Zyrtarë izraelitë u kontaktuan menjëherë për lajmin por nuk dhanë asnjë koment të menjëhershëm.
Lajmi vjen pas ditësh të tmerrshme për komunitetin në Gaza të cilët kana qenë në shënjestër të sulmeve të egra nga ushtria izraelitë ditët e fundit që pas një offensive të re në shkallë të gjerë. Qytetet e Gazës dhe ato pranë saj po vuajnë prej muajsh tashmë krizën humanitare të krijuar për shkak të mungesës së ndihmave ushqimore e mjekësore.
Izraeli ka lejuar hyrjen e tyre ditët e fundit në rripin e gazës, por sipas OKB ato janë të pamjaftueshme. Javën e kaluar organizata dha alarmin se mijëra fëmijë në gaza rrezikojnë vdekjen nga uria. Burime të mediave arabe raportuan këtë të hënë për një ndërhyrje të presidentit amerikan në situatën e krijuar. Sipas burimeve të Sky News Arabia, Donald Trump mund të njoftojë një armëpushim në Gaza në ditët në vijim. Që prej nisjen së luftës në tetor 2023 në Gaza jana shkaktuar mbi 55 mijë viktima sipas autoriteteve palestineze.
