Hamasi ka kërcënuar në mënyrë specifike se do të sulmojë qytetin izraelit të Ashkelon në përgjigje të sulmeve të Izraelit në Gaza.
Një zëdhënës i Hamasit ka lëshuar ditën e sotme një paralajmërim për banorët e qytetit jugor izraelit të Ashkelon që të largohen nga qyteti para orës 17:00 me kohën lokale të Izraelit.
Në një postim në Telegram, Hamasi tha se banorët e qytetit, në veri të Rripit të Gazës, kanë kohë deri në orën 17:00 për t’u larguar, raporton BBC.
Më shumë se 4,500 raketa janë lëshuar tashmë nga Gaza në Izrael që nga e shtuna, kanë bërë të ditur ushtria izraelite.
Ditën e shtunë në mëngjes, grupi militant i Hamasit që sundon Rripin e Gazës kreu një sulm vdekjeprurës me shumë fronte në Izrael.
Ndërkohë Izraeli iu kundërpërgjigj me sulme ajrore ku ditën e dielë shpalli edhe zyrtarisht gjendjen e luftës.
Nga raportimet e derimëtanishme, mësohet se numri i viktimave ka kaluar 1700, ku mbi 150 prej tyre janë fëmijë: rreth 900 janë izraelitë dhe mbi 700 janë palestinezë në Gaza. Mijëra persona të tjerë kanë mbetur të plagosur./m.j
