Një konflikt i ri ligjor ka përfshirë Halle Berry dhe ish-bashkëshortin e saj, Olivier Martinez, këtë herë lidhur me kujdestarinë e djalit të tyre 12-vjeçar, Maceo.
Martinez ka marrë përkohësisht kujdestarinë kryesore të fëmijës, pasi në dokumentet e depozituara në një gjykatë në Los Angeles ka pretenduar se Berry ka ushtruar abuzim fizik ndaj djalit. Përfaqësuesit e aktores i kanë hedhur poshtë me forcë këto akuza, duke i cilësuar “plotësisht të pabazuara”.
Sipas urdhrit të përkohshëm të gjykatës, Berry mund ta takojë Maceon dy herë gjatë javës dhe çdo fundjavë të dytë. Rishqyrtimi i çështjes është caktuar për 16 tetor.
Ish-bashkëshorti i aktores pretendon se gjatë rreth 18 muajve të fundit kanë ndodhur disa episode përplasjeje fizike mes Berry-t dhe djalit. Ai thotë se në disa raste aktorja e ka kapur Maceon në qafë, duke e paraqitur veprimin si lojë, ndërsa fëmija, sipas tij, nuk e ka përjetuar në këtë mënyrë.
Një nga episodet më të rënda të përmendura nga Martinez thuhet se ka ndodhur në dhomën e Maceos, ndërsa 12-vjeçari po përdorte një pajisje të realitetit virtual.
Sipas deklaratës së tij, Berry hyri në dhomë dhe nisi ta shtynte djalin, përpara se situata të përshkallëzohej. Martinez pretendon se ajo e ofendoi Maceon dhe më pas e kapi nga fyti, duke i bërtitur: “Kush është përgjegjës tani?”. Ai thotë se djali arriti të largohej dhe filloi të bërtiste.
Martinez ka deklaruar gjithashtu në dokumentet gjyqësore se Van Hunt, partneri aktual i Berry-t, hyri në dhomë dhe e ndihmoi Maceon. Sipas tij, më vonë djali e telefonoi dhe i kërkoi të shkonte ta merrte menjëherë.
Avokatja e Halle Berry-t, Marina Beck, i ka mohuar akuzat dhe e ka përshkruar kërkesën e Martinez si “plotësisht të pabazuar”. Ndërkohë, një burim pranë aktores ka thënë se ish-bashkëshorti po përpiqet ta dëmtojë Berry-n duke përdorur mosmarrëveshjet për djalin.
Berry dhe Martinez u ndanë në vitin 2015, ndërsa divorci i tyre u përfundua në vitin 2023, pas disa vitesh përplasjesh ligjore.
Një vit më parë, në 2024, Berry kishte kërkuar kujdestarinë e vetme të Maceos. Ajo kishte argumentuar se djali po haste probleme në shkollë dhe kishte nevoja të veçanta arsimore, ndërsa pretendonte se Martinez nuk i kuptonte ose i linte pas dore këto vështirësi.
Në seancën e 16 tetorit, të dyja palët pritet të paraqesin prova dhe argumente. Gjykata do të shqyrtojë urdhrin e përkohshëm mbrojtës, si edhe çështjen e kujdestarisë së Maceos.
