Protesta e thirrur në mbështetje të Erjon Bobës, 15-vjeçarit që humbi jetën pas një konflikti mes adoleshentësh, mblodhi vetëm familjarët e afërt, të cilët kërkojnë transparencë të plotë dhe drejtësi për ngjarjen tragjike.
Mes të pranishmëve, halla e viktimës, Barie Çupi, u shpreh se kjo protestë nuk ishte një tubim familjar, por një thirrje e hapur për qytetarët dhe institucionet që të reflektojnë dhe të marrin masa, në mënyrë që ngjarje të tilla të mos përsëriten.
“Kjo heshtje dhe kjo neglizhencë e këtij populli përpara një fatkeqësie kaq të rëndë mendoj se është tregon një rënie të të ndërgjegjes njerëzore, të dhimbjes, madje dhe ta them dhimbjes kombëtare. Neve na iku djali, nuk na kthehet më ai djalë sikur bota të përmbyset. Por ka diçka tjetër mbrapa, se prindërit që janë sot kudo në çdo familje apo mësues nëpër shkolla, mjekë nëpër spitale, kudo që janë, do të dinë një gjë që nesër mund të ketë një Erjon tjetër si Erjoni, si Martini dhe kjo është plaga që la Erjoni mbrapa. Thikat e Erjonit janë në çdo zemër shqiptare sot, nuk janë vetëm tek ne. Thikat Erionit mund të jenë thikat e dikujt e një fëmije tjetër nesër. E lus Zotin që mos i ndodhë kujt më. Por kjo neglizhencë e popullit shqiptar apo e gjithë prindërve nuk për ne është tregon që edhe drejtësia për Erjonin është shumë e vështirë”, tha halla e viktimës, Barie Çupi.
Ajo kërkoi një hetim të drejtë dhe të thelluar, për të garantuar që Erjoni të mos mbetet një statistikë dhe që drejtësia të vihet në vend. “Nga drejtësia presim të zbardhet çështja dhe të marrë dënimin që meriton sepse nuk ishte vetëm një vrasës. Ai kishte dhe dy tre shokë të tjerë bashkë me të. Të gjithë të shkojnë para përgjegjësisë”, tha zonja Çupi.
Edhe një tjetër prind i pranishëm në protestë shprehu mbështetjen e tij për familjen Boba, duke kërkuar drejtësi për ngjarjen.
“Fatkeqësi e madhe e ranë që merr ato që e kanë e provojnë. Fatkeqësisht shoqëri ne po jetojmë në një shoqëri depresive, indiferente që nuk secili sheh veç punën e vet dhe nuk reagon nuk reagon për asgjë. Nuk solidarizohet, nuk mbështet dhe kjo është e dhimbshme”, tha Shaqir Çerpja.
Ai shtoi se ngjarje të tilla ndodhin sepse nuk po rritet një brez me edukatë, por agresiv. “Sepse nxënësit shkojnë në shkollë pa e çanta dhe kur marrin çanta nuk marrin libra, fletore, por marrin thika e municione. Dhe askush s’i interesohet se ç bën fëmija”.
Erjon Boba u konfliktua me një grup bashkëmoshatarësh në zonën e Ish-Kënetës, më 25 nëntor, ku një prej tyre e goditi me thikë. Pas disa ditësh në spital, në përpjekje për të shpëtuar jetën, i mituri ndërroi jetë në QSUT disa ditë pas plagosjes.
