Zbërthimi i aplikacioneve të krimit Sky Ecc, EncroChat dhe Matrix ka rezultuar në “thesar” për anti-mafian italiane dhe Strukturën e Posaçme Anti-korrupsion, SPAK, duke çuar në identifikimin e një rrjeti gjigant të trafikut të kokainës nga vendet e Amerikës Latine drejt Europës, por edhe në Itali e Shqipëri. SPAK lëshoi 52 urdhër-arreste, 42 prej të cilëve janë ekzekutuar. Anëtarët e grupit janë shqiptarë dhe italianë.
Baza e grupit ishte në Durrës, ku funksiononin, siç u shpreh edhe kreu i SPAK Altin Dumani në konferencën me prokurorët italianë, në disa nën-grupe ku bashkëvepronin në trafikimin e lëndëve narkotike, ndër to droga të forta si kokaina e heroina si dhe në transportimin e shumave të mëdha në euro nga njëri shtet në tjetrin.
Nga zbardhja e dosjes italiane për rrjetin kriminal, zbardhen edhe nofkat që përdornin anëtarët e rrjetit, duke fshehur identitetin e vërtetë.
Genci Telollari thirrej edhe si “Lo Zio” ose “daja”, Nuredin Kiptiu njihej me disa nofka si ‘Nuro’, ‘Nero’ (Gabeli), ‘Blaki’ dhe ‘Dino’, Ekil Nderjaku mbante nofkën “Kili”, Erigels Presi njihej edhe si “Seriali”, “Gelsi” e “Enrico”, Adi Coba thirrej si “Gipsi”, “Bazholi” e “Bestia”.
Shtetasja italiane Serafina Palazzo mbante nofkën “la Zia” (tezja ose halla), ndërsa Francesca Caputi thërritej edhe si “la nonna” ose “gjyshja”. Giovanni Sgnorile thërritet edhe si “Il Padre di quello”.
Agron Ganaj mban nofkën “Goni”, “Marco” dhe “Jubi”.
Në dosjen italiane zë vend edhe Elvis Doçi i cili thërritet si “Visi i Pojës” dhe Ervis Deti që mban edhe nofkën “Visi” e “Po Po”.
Po ashtu, anëtarët e grupit kriminal përdornin kode edhe në bisedat mes tyre ku në pjesë të mirë të tyre i referoheshin lëndëve narkotike, por po përmes nofkave identifikonin edhe efektivët e policisë apo ata që shërbenin në rolin e korrierëve.
Shprehje të tilla si “e bardha” identifikojnë lëndën narkotike të llojit kokainë. “E kuqja” mendohet se lidhet me heroinën, një tjetër drogë e fortë.
Gjithashtu përdoren edhe termat “mall” dhe “punë” ku i referohen aktivitetit që ushtrohet, trafikut të drogës. Në bisedat mes anëtarëve të rrjetit kriminal, efektivët e policisë etiketohen “të zinj”.
Nuk mungojnë as termat “gol” dhe “bingo” të cilat i referohen, sipas bisedave, dinamikës së trafikimit të lëndës narkotike.
