Deputeti i Partisë Demokratike, Eduard Halimi u shpreh të mërkurën se reforma në drejtësi është e rëndësishme të kryhet sipas ekspertizës e standardeve europiane dhe të jetë transparente dhe gjithëpërfshirëse.
Paraditen e sotme në selinë e PD-së u mblodhën përfaqësuesit e opozitës, pjesë e komisionit të posaçëm për reformën në drejtësi, të cilit opozita iu bashkangjit vetëm dy javë më parë duke i dhënë fund bojkotit disamujor të tij.
Në përfundim të këtij takimi, Halimi, nënkryetari demokrat i komisionit, tha se u diskutua për punën e kryer deri tani nga komisioni i reformës, që përfshin një dokument analitik, i bërë publik para disa javësh.
“Ekspertët dhe anëtarët tanë të komisionit do të shohin me hollësi nëse kjo analizë dhe strategji është e plotë dhe nëse këto zgjidhje janë efiçente dhe shkojnë drejt standardeve më të mira europiane. Ekspertët e PD-së do i bashkangjiten grupit të Ekspertëve të Nivelit të Lartë dhe puna do të vazhdojë në mënyrë të përbashkët. Partia Demokratike do i japë impakt konkret reformës në drejtësi”, tha Halimi.
I pyetur për ndërhyrjet e mundshme në Kushtetutë në kuadër të reformës në fjalë, ai u përgjigj se PD po përgatit draftin e saj të ndryshimeve kushtetuese dhe ligjore. Një platformë e prezantuar një vit më parë nga opozita, vijoi Halimi, parashikon që ndryshimet kushtetuese duhet të shkojnë në drejtim të forcimit të pavarësisë së institucioneve dhe luftës ndaj korrupsionit. Sipas tij ato duhet të bazohen në rekomandimet e progres raporteve të KE-së ndër vite.
“PD ka kërkuar prej kohësh që çdo ndryshim në Kushtetutë apo në ligje të tjera duhet të vijë nga ekspertiza ndërkombëtare”, tha ai.
I pyetur nga gazetarët nëse opozita ka qëllim të njëjtë me atë të kryeministrit Edi Rama për ta miratuar reformën në drejtësi në parlament brenda muajit nëntor, Halimi u përgjigj se ‘ne nuk merremi me axhendën e kryeministrit, por me axhendën e PD-së, që synon që brenda shtatorit ne të mos pengojmë punën për dërgimin e të gjithë strategjisë dhe dokumenteve në Komisionin e Venecias”.
“Që të mos pengohet ky proces ne po punojmë të kemi një platformë të qartë. Do të jetë Komisioni i Venecias dhe ndërkombëtarët që do të japin opinionin e tyre lidhur me zgjidhjet për procesin e reformës në drejtësi”, u shpreh Halimi nënkryetar i komisionit për reformën në drejtësi.
