Partia Demokratike e konsideron të drejtë protestën e avokatëve ne gjithë Shqipërine dhe mbështet kërkesat e tyre, si të ligjshme e kushtetutese.
Në një deklaratë për mediat deputeti i PD-së, Eduard Halimi u shpreh se “Vendimi i qeverisë për të caktuar pagën minimale të avokatëve, sjell rritjen disa herë të barrës së sigurimeve shoqërore e shëndetësore, çka është arbitrare, armiqësore, dhe në kundershtim flagrant me Kushtetuten e vendit. Kjo barrë që qeveria ka vënë mbi profesionistët e lirë, është rrënuese për mbi 3000 avokatë efektive por veçanërisht mbi avokatët e rinj që sapo kanë nisur punën, çka e bën të pamundur për ta, ushtrimin e profesionit”.
“Rritja e detyrimit per sigurimin shoqëror e shëndetësor deri në 4 herë më shumë, do të bëjë që 60% avokatëve të paguajnë deri në 300 mijë lekë në muaj sigurime, ndërsa 40% deri në 250 mijë lekë në muaj, pavarësisht nëse kanë pasur ose jo të ardhura. Caktimi i pagës për profesionet e lira, që nuk kanë lidhje me shtetin, është e drejtë e tyre kushtetutese”, tha Halimi.
Po ashtu, Halimi tha se , “Partia Demokratike mbështet plotësisht protestën e profesioneve të lira dhe i inkurajon avokatet, si njerëz të ligjit, që të mbrojnë të parët të drejtat kushtetutese, për vete dhe profesionet e tjera të lira në Shqipëri, inkurajon ata të shkojnë deri në mosbindje civile, përballë kësaj qeveria e kryeministri që nuk sheh dhe nuk dëgjon kërkesat dhe shqetësimet e tyre”.
