Demokratët kanë ripërsëritur shqetësimet e tyre për Draftin e Reformës në Drejtësi. Deputeti Eduard Halimi, i cili është anëtar i Komisionit të posaçëm për Reformën, ka deklaruar se në këtë formë që është aktualisht politizohen institucionet. Kjo gjë sipas tij duhet të ndryshohet në mënyrë që drafti të ketë konsensusin e opozitës.
“Problemi i qëndrimit dhe i prezencës së ministrit të drejtësisë kurdoqoftë ai në institucionet e drejtësisë në Këshillin e Lartë të Drejtësisë, në Këshillin e Prokurorisë, në Tribunalin Gjyqësor, në Inspektoriatin e Këshillit të Lartë të Drejtësisë pra të inspektimit të gjyqtarëve. E gjithë kjo prezencë e ministrit duhet të shmanget. Pjesa po ashtu e emërimit të një numri të madh të personave të cilët do të jenë prezentë në institucionet e drejtësisë. Opozita ka qenë dhe është e vendosur se reforma në drejtësi duhet të bëhet por drafti nuk përmbush standarte të cilat janë ndërkombëtarisht të njohura dhe që forcojnë pavarësinë,” tha Halimi.
Gjithsesi Halimi theksoi se ka ende vend për të gjetur konsensusin, nëse ndiqet rruga në të cilën u arrit dekriminalizimi.
“Dhe me atë model që u udhëhoq edhe komisioni për dekriminalizimin pra pa arrogancë nga mazhoranca dhe me një qëllim të përbashkët për të arritur në realizimin final,” vijoi Halimi.
